छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : दोन महिन्यांपूर्वीच नोकरीला लागलेल्या २५ वर्षीय नर्सचा हडकोतील एम्स हॉस्पिटलमध्ये रविवारी (२१ सप्टेंबर) संशयास्पदरीत्या मृत्यू झाल्याने खळबळ उडाली आहे. इंजेक्शनच्या ओव्हरडोसमुळे हा मृत्यू झाल्याचा संशय डॉक्टरांनी व्यक्त केला आहे. सिडको पोलिसांनी मृतदेह ताब्यात घेऊन उत्तरीय तपासणीसाठी घाटी रुग्णालयात पाठवला. त्याचा अहवाल आल्यानंतर मृत्यूचे खरे कारण समोर येणार आहे.
हर्षदा पद्माकर तायडे (वय २५, रा. मिसारवाडी) असे मृत्यू झालेल्या तरुणीचे नाव आहे. दोन महिन्यांपूर्वी हॉस्पिटलमध्ये नोकरीला लागल्यानंतर तिची नियुक्ती ऑपरेशन थिएटरमध्ये करण्यात आली होती. रविवारी दुपारी बराच वेळ ती न दिसल्याने सहकाऱ्यांनी तिला कॉल केला, तेव्हा तिने स्वच्छतागृहात असल्याचे सांगितले. मात्र त्यानंतरही बराच वेळ ती येत नसल्याने सहकाऱ्यांनी जाऊन पाहिले असता ती बेशुद्धावस्थेत दिसली. बाथरूममध्ये इंजेक्शनही होते. हॉस्पिटलमधील डॉक्टरांच्या म्हणण्यानुसार तिने इंजेक्शनचे ओव्हरडोस घेतल्यामुळे तिचा मृत्यू झाला. घटनास्थळी पोलीस उपनिरीक्षक निवृत्ती गायके यांनी सहकाऱ्यांसह भेट दिली.
हर्षदाच्या मागे आई, वडील, दोन बहिणी, एक भाऊ आहे. सिडको पोलिसांनी आकस्मिक मृत्यूची नोंद केली असून, तपास सहायक पोलीस उपनिरीक्षक देविदास राठोड करत आहेत. दरम्यान, हर्षदाच्या भावाने पत्रकारांना सांगितले, की मी दुपारी साडेचारला हर्षदाला कॉल केला असता तिच्या सहकाऱ्यांनी उचलला. त्यांनी तिच्या डोक्याला लागल्याचे सांगितले. घटना अशी होती तर मग हॉस्पिटलमधून तिच्या डोक्याला लागल्याचे का सांगितले गेले? हर्षदाच्या मृत्यूमुळे एम्स हॉस्पिटल संशयाच्या घेऱ्यात सापडले असून, या मृत्यूची कसून चौकशी होण्याची गरज निर्माण झाली आहे.
.jpg)
.jpg)
