दोन्ही मुलीच झाल्याने सतत छळ, २८ वर्षीय नाजियाने गळफास घेऊन संपवल्या यातना!, नारेगावची घटना

By City News Desk

On 29 Nov 2025

दोन्ही मुलीच झाल्याने सतत छळ, २८ वर्षीय नाजियाने गळफास घेऊन संपवल्या यातना!, नारेगावची घटना

Copying of any text or photographs published on this website in whole or in part without the permission of 'Metropolis Post' newspaper is strictly prohibited. Please note that legal action will be taken if anyone is found doing so. - Editor, Metropolis Post

छत्रपती संभाजीनगर (मेट्रोपोलिस पोस्ट वृत्तसेवा) : नाजिया सय्यद आमेरोद्दीन (वय २८, रा. नारेगाव) हिच्या आत्‍महत्‍येप्रकरणी सिडको एमआयडीसी पोलिसांनी तिच्या पतीसह सासरच्या ६ जणांविरुद्ध शुक्रवारी (२८ नोव्‍हेंबर) गुन्हा दाखल केला आहे. सर्व संशयितांना पोलिसांनी लगेचच ताब्यात घेतले. गुरुवारी (२७ नोव्‍हेंबर) रात्री नाजियाने राहत्‍या घरात गळफास घेऊन आत्‍महत्‍या केली होती. दोन्ही मुलीच झाल्याने व माहेरच्यांकडून पैसे आणत नसल्याने तिचा छळ केला जात होता.

नाजियाचा विवाह २०१८ मध्ये आमेरोद्दीन सय्यद आसेफोद्दीन याच्यासोबत झाला होता. दोन्ही मुलीच झाल्याने तिचा पती व सासरच्यांकडून छळ सुरू झाला. माहेरहून पैसे आणायला सांगायचे. मात्र माहेरची परिस्थिती नाजूक असल्याने ती नकार देत होती. यातूनच तिला अनेकदा घराबाहेरही काढण्यात आले होते. तिने सप्टेंबर महिन्यात पोलिसांत तक्रारही दिली होती. पोलिसांनी गुन्हाही दाखल केला होता. त्यानंतर नातेवाइकांनी मध्यस्थी केल्याने ती पुन्हा नांदायला गेली. मात्र पुन्हा त्रास देणे सुरू झाले. गुरुवारी (२७ नोव्हेंबर) नाजिया मुलींसह घरी असताना आमेरोद्दीनने पुन्हा तिला मारहाण केली. त्यानंतर नाजियाने गळफास घेऊन आत्‍महत्‍या केली. नाजियाचे भाऊ शेख समीर शेख अमीर यांच्या तक्रारीवरून आत्‍महत्‍येस प्रवृत्त केल्याप्रकरणी पोलिसांनी गुन्हा दाखल केला आहे.