सासू-सुनेचं नव्हे, जणू होतं मायलेकीचं नातं... सासूच्या निधनाचे वृत्त कळताच सुनेचाही हार्टॲटॅकने मृत्यू, छत्रपती संभाजीनगर शहरातील घटना

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : शंभरीच्या उंबरठ्यावर असलेल्या सासूच्या निधनाचे वृत्त समजताच सुनेचाही हृदयविकाराच्या धक्क्याने मृत्यू झाल्याची हृदयद्रावक घटना छत्रपती संभाजीनगर शहरातील वेदांतनगर भागात आज, ४ नोव्हेंबरला घडली. दोघी डॉ. बाबासाहेब आंबेडकर मराठवाडा विद्यापीठाचे माजी सुरक्षा अधिकारी सुरेश परदेशी यांच्या पत्नी व आई होत.

डॉ. बाबासाहेब आंबेडकर मराठवाडा विद्यापीठाचे माजी सुरक्षा अधिकारी सुरेश रूपचंद परदेशी (रा. वेदांतनगर) यांच्या आई रुक्मिणी रूपचंद परदेशी (वय ९६) दीपावलीनिमित्त नाशिकला भावाकडे गेल्या होत्या. मंगळवारी दुपारी एकला सुरेश परदेशी हे घरी असताना आईच्या निधनाची वार्ता त्यांना भावाने कळवली. यानंतर नाशिकला तातडीने निघायचे असल्यामुळे तयारीला लागलेले असतानाच पत्नी विजया सुरेश परदेशी (वय ६२) यांनाही हृदयविकाराचा तीव्र झटका आला. घाटी रुग्णालयात पोहोचण्यापूर्वीच त्यांचे निधन झाले. .

या दोघींमध्ये आई, मुलीप्रमाणे जिव्हाळ्याचे नाते असल्यामुळे हा धक्का त्यांना सहन  न झाल्याचे कुटुंबियांच्या वतीने सांगण्यात आले. रुक्मिणीबाई परदेशी यांच्या पश्चात पाच मुले, एक मुलगी, नातवंडे असा परिवार आहे.  विजया परदेशी यांच्यावर बुधवारी (३ ऑक्‍टोबर) दुपारी तीनला पुष्पनगरी स्मशानभूमीत (मध्यवर्ती बसस्थानकाजवळ) अंत्यसंस्कार करण्यात येणार आहेत. त्यांच्या पश्चात पती, दोन विवाहित मुली, एक मुलगा, नातवंडे असा परिवार आहे. सुरेश परदेशी हे भारतीय सैन्यातील सेवानिवृत्त अधिकारी असून, निवृत्तीनंतर ते विद्यापीठात सुरक्षा अधिकारी म्हणून रूजू झाले होते. २०२० मध्ये ते निवृत्त झाले होते.