'एमआयएम' पदाधिकारी, माजी नगरसेविकेचा पती हातभट्टी दारू धंद्यात!; गजबजलेल्या वस्तीत अड्डा, जिन्सी पोलिसांच्या हद्दीत शहर गुन्हे शाखेची मोठी कारवाई

By City News Desk

On 11 Aug 2025

'एमआयएम' पदाधिकारी, माजी नगरसेविकेचा पती हातभट्टी दारू धंद्यात!; गजबजलेल्या वस्तीत अड्डा, जिन्सी पोलिसांच्या हद्दीत शहर गुन्हे शाखेची मोठी कारवाई

छत्रपती संभाजीनगर (सीएससीएन वृत्तसेवा) : आपल्या हद्दीत अत्‍यंत गजबजलेल्या भागात हातभट्टीचा मोठा दारू अड्डा चालतोय, हे जणू जिन्सी पोलिसांना माहीतच नव्हते. इतके दिवस राजरोस सुरू असलेला हातभट्टीचा मोठा अड्डा शेवटी शहर गुन्हे शाखेला जाऊन उद्‌ध्वस्त करावा लागला. शनिवारी (९ ऑगस्ट) दुपारी चारला शहा बाजारमधील रवींद्रनगरात अनिसा शाळेजवळ ही कारवाई करण्यात आली. गावठी दारू, दारू तयार करण्यासाठी वापरलेली विविध रसायने पोलिसांनी जप्त केली. अड्डाचालक आरेफ हुसैनी हा छापा पडताच पळून गेला. तो एमआयएमचा राज्य प्रवक्ता आणि माजी नगरसेविकेचा पती असल्याची पुष्टी पोलिसांच्या हवाल्याने एका वृत्तपत्राने केली आहे.

स्वतःच्या घरातच हुसैनीने हातभट्टीचा अड्डा थाटला होता. ही माहिती शहर गुन्हे शाखेला कळताच पोलीस आयुक्त प्रवीण पवार, पोलीस उपायुक्त रत्नाकर नवले, सहायक पोलीस आयुक्त मनोज पगारे, गुन्हे शाखेचे वरिष्ठ पोलीस निरीक्षक संभाजी पवार यांच्या मार्गदर्शनाखाली पथकाने छापा मारला. १ लाख ५५ हजार ४०० रुपये किमतीचे साहित्य जप्त करत अड्डा उद्‌ध्वस्त केला. ही कारवाई सहायक पोलीस निरीक्षक रविकांत गच्चे, सहायक फौजदार दिलीप मोदी, मनोज अकोले, योगेश गुप्ता, प्रकाश गायकवाड, अशरफ सय्यद, अमोल शिंदे, श्याम आडे, सागर पांढरे, संतोष भानुसे, जालिंदर गोरे, अमोल मुगळे, प्रीती इंगल यांनी केली. याप्रकरणी जिन्सी पोलीस ठाण्यात पोलीस अंमलदार मनोज अकोले यांच्या तक्रारीवरून आरेफ हुसैनी (रा. चंपा चौक) याच्याविरुद्ध गुन्हा दाखल करण्यात आला आहे. १ लाख ५५ हजार रुपयांचा मुद्देमाल जप्त करण्यात आला आहे.