पती-पत्नीच्या भांडणात तिसऱ्याने येऊन ‘तिला का मारतो’ म्हणत पतीला चाकूने भोसकले!, नारेगावची घटना

By City News Desk

On 20 Mar 2026

पती-पत्नीच्या भांडणात तिसऱ्याने येऊन ‘तिला का मारतो’ म्हणत पतीला चाकूने भोसकले!, नारेगावची घटना

Copying of any text or photographs published on this website in whole or in part without the permission of 'Metropolis Post' newspaper is strictly prohibited. Please note that legal action will be taken if anyone is found doing so. - Editor, Metropolis Post

छत्रपती संभाजीनगर (मेट्रोपोलिस पोस्ट वृत्तसेवा) : पती-पत्नीचे भांडण सुरू असताना तिसऱ्याने येऊन तिला का मारतो, असे म्हणून पतीला चाकूने भोसकून गंभीर जखमी केले. ही घटना सिडको एमआयडीसी पोलीस ठाण्याच्या हद्दीतील मोतीवाला कॉलनीत बुधवारी (१८ मार्च) रात्री नऊच्या सुमारास घडली.

सलमान सत्तार सय्यद (वय २७, रा. नारेगाव) असे जखमी पतीचे नाव आहे. त्याची २० वर्षीय पत्नी आईकडे मोतीवाला कॉलनीत गेलेली होती. सलमान तिला घेण्यासाठी गेला. पत्नीने सोबत येण्यास नकार दिल्याने संतापलेल्या सलमानने तिला हाताचापटाने मारहाण केली. या वेळी तिने आरडाओरड केल्याने गल्लीतील लोक जमा झाले. जुनेद नावाचा युवकही आला. त्याने सलमानला ‘तू तुझ्या पत्नीला का मारतो’, असे म्हणून शिवीगाळ करत हाताचापटाने मारहाण केली.

गल्लीतील लोकांनी त्यांचे भांडण सोडवले. त्यानंतर सलमान बाजूला येऊन थांबला व भावाला कॉल केला. त्याचवेळी जुनेदने परत येऊन सलमानला शिवीगाळ करत त्याच्या खिशातील चाकू काढून डाव्या बाजूला पोटावर मारून जखमी केले व पळून गेला. तिथे आलेल्या सलमानच्या भावाने व मित्राने त्याला जखमी अवस्थेत घाटी रुग्णालयात दाखल केले. सलमानच्या तक्रारीवरून सिडको एमआयडीसी पोलिसांनी जुनेद नावाच्या युवकाविरुद्ध गुन्हा दाखल केला आहे. अधिक तपास पोलीस अंमलदार कपील म्हस्के करत आहेत.