छत्रपती संभाजीनगर (मेट्रोपोलिस पोस्ट वृत्तसेवा) : डॉक्टर दाम्पत्याचे घर फोडून चोरट्याने ६६ हजार ५०० रुपयांचा मुद्देमाल चोरून नेला. ही घटना सन्मित्र कॉलनीतील विजयालक्ष्मी अपार्टमेंटमध्ये शुक्रवारी (६ मार्च) दुपारी घडली. क्रांती चौक पोलिसांनी चोरट्याविरुद्ध गुन्हा दाखल केला आहे.
डॉ. सुधाकर सोन्याबापू शेळके (वय ५६, रा. विजयालक्ष्मी अपार्टमेंट, सन्मित्र कॉलनी) यांनी या प्रकरणात तक्रार दिली आहे. ते पत्नी डॉ. जयश्री यांच्यासोबत राहतात. ते व त्यांची पत्नी आरोग्य विभागात नोकरी करतात. शुक्रवारी (६ मार्च) डॉ. जयश्री नेहमीप्रमाणे सकाळी १० ला नोकरीच्या ठिकाणी गेल्या. डॉ. सुधाकर हे दुपारी सव्वा दोनच्या सुमारास त्यांच्या बहिणीच्या डोळ्यांची शस्त्रक्रिया झाल्यामुळे तिची ड्रेसींग करण्यासाठी गेले. त्यांच्या फ्लॅटच्या खालच्या मजल्यावर सुनीता सतिश ढोले कुटुंबासह राहतात. त्यांच्याही घराला कुलूप लावलेले असल्याचे डॉ. सुधाकर यांनी जाताना पाहिले.
बहिणीची ड्रेसींग करून दुपारी साडेतीनला डॉ. सुधाकर हे घरी परतले असता घराचे कुलूप तोडलेले दिसले. बाहेरून दरवाजाची कडी लावलेली दिसली. त्यानंतर बेडरूममधील सामान उचकटून अस्ताव्यस्त पडलेले दिसले. सुनीता ढोले यांच्याघरीदेखील चोरी झाल्याचे याचदरम्यान समोर आले. दोघांच्या घरातून चांदीचे जोडवे, पैंजण, कुंकवाचे करंडे, सोन्याचे कानातले दागने, रोकड, कारचे आरसी, आधार कार्ड, पॅनकार्ड, मतदान कार्ड, ड्रायव्हिंग लायसन्स असा एकूण ६६ हजार ५०० रुपयांचा मुद्देमाल चोरट्याने चोरून नेला. अधिक तपास पोलीस उपनिरीक्षक देविदास शेवाळे करत आहेत.
.jpeg)
.jpg)
