हडकोतील जयलक्ष्मी पी. एस. विद्यालयाच्या संस्थापकासह दोन मुख्याध्यापकांविरुद्ध गुन्हा दाखल, असा कारनामा केला कसा, पोलीसही चक्रावले...

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : हडको येथील जयलक्ष्मी पी. एस. विद्यालयाचा संस्थापक गणेश काळे, मुख्याध्यापक सूर्यवंशी व उपासे यांच्याविरुद्ध फुलंब्री पोलिसांनी गुन्हा दाखल केला आहे. त्यांच्याविरुद्ध फुलंब्रीतील न्यू ओॲसिस इंग्रजी शाळेचे ६० विद्यार्थी ऑनलाइन पळविल्याचा आरोप आहे.

फुलंब्रीतील मानमोडी शिवारात न्यू ओॲसिस इंग्लिश स्कूल व ज्युनिअर कॉलेज आहे. या शाळेच्या मुख्याध्यापिका करुणा दांडगे यांनी या प्रकरणात तक्रार दिली. त्यांच्या शाळेचा यूजर आयडी व पासवर्ड मिळवून तब्बल ६० विद्यार्थी छत्रपती संभाजीनगरच्या हडकोतील जयलक्ष्मी पी. एस. विद्यालयात ऑनलाइन पद्धतीने वळविण्यात आले. हा प्रकार २८ सप्टेंबच्या रात्री झाला. न्यू ओॲसिस स्कूल प्रशासनाने ऑनलाइन विद्यार्थी तपासले असता आपले विद्यार्थी दुसऱ्याच शाळेत ट्रान्स्फर झाल्याचे लक्षात आले.

यानंतर मुख्याध्यापिका दांडगे यांनी पोलिसांत धाव घेतली. शुक्रवारी (१४ नोव्‍हेंबर) सायंकाळी फुलंब्री पोलीस ठाण्यात गुन्हा दाखल करण्यात आला आहे. संस्थापक व मुख्याध्यापकांनी संगनमताने विद्यार्थ्यांची नावे आपल्या शाळेच्या अभिलेखांवर ऑनलाइन पद्धतीने वळवून फसवणूक केल्याचा आरोप तक्रारीत लावण्यात आला आहे. विद्यार्थिसंख्येनुसार मिळणारे अनुदान लाटण्यासाठी व वाढीव पटसंख्या दर्शवून नवीन तुकडी आणि शिक्षकांच्या पदांना मंजुरी मिळवण्यासाठी हा उपद्व्याप करण्यात आल्याची चर्चा आहे.  अधिक तपास पोलीस करत आहेत.