पहाटे मोंढा नाका उड्डाणपुलावर भीषण अपघात; सुसाट कारने रिक्षाला उडवले, तरुणासह चिमुकलीचा मृत्यू, ४ गंभीर जखमी 

छत्रपती संभाजीनगर (मेट्रोपोलिस पोस्ट वृत्तसेवा) : जालना रोडवरील मोंढा नाका उड्डाणपुलावर शनिवारी (२१ डिसेंबर) पहाटे १ च्या सुमारास भरधाव आलिशान कारने ऑटोरिक्षाला मागून जोरात धडक दिली होती. या भीषण अपघातात अख्तर रजा (वय २१) आणि जोहरा बानू (वय ५) या मामा-भाचीचा अपघातस्थळीच मृत्यू झाला, तर गंभीर जखमी महिला आलिझा अहमद रजा यांच्या गर्भातील सात महिन्यांचे बाळही दगावल्याची माहिती पोलीस निरीक्षक सचिन कुंभार यांनी दिली. पोलिसांनी कारचालक कश्यप विनोद पटेल (वय ३३, रा. कुशलनगर) याला अटक केली आहे.

अब्दुल्ला अबित अब्दुल्ला मुजीब यांनी जवाहरनगर पोलीस ठाण्यात कारचालकाविरुद्ध तक्रार दिली. तक्रारीनुसार, शनिवारी रात्री ९:१५ वाजता अब्दुल्ला अबित, त्याची मावशी अजराबानू जेधपूरवाला, मावशीचा मुलगा अख्तर रजा, अहमद रजा, मुली उजमा बानो व जेबा बानो, सून अलिझा आणि नात जोहरा हे सिडकोतील कामगार चौकाजवळील एका हॉटेलमध्ये जेवणासाठी गेले होते. जेवणानंतर अहमद रजा आणि त्याची बहीण जेबा बानो हे स्कूटीने परत निघाले तर तर बाकीचे सर्व जण मोहंमद बारी यांच्या रिक्षाने (क्र. एमएच २०, ईके ४५५७) सिटी चौक परिसरातील जुना बाजारकडे घराकडे निघाले. अहमद रजा यांची स्कुटी पुढे, तर मागे रिक्षा होती. मोंढा नाका उड्डाणपुलावरून जाताना मागून आलेल्या सुसाट कारने (क्र. एमएच २०, जीक्यू ०२२१) रिक्षाला जोरात धडक दिली.

यात रिक्षातील अख्तर रजा हा उंच उडून उड्डाणपुलावरून थेट खाली सिंधी कॉलनीच्या बाजूने रस्त्यावर कोसळला. स्कुटीवरील अहमद रजा यांनी तत्काळ खाली जाऊन अख्तरला रुग्णालयात दाखल केले. अन्य नागरिकांनी मदत करून रुग्णवाहिका बोलावून जखमींनाही एमजीएम रुग्णालयात आणले. तिथे डॉक्टरांनी तपासून अख्तर आणि जोहरा यांना मृत घोषित केले, तर अलिझा यांच्या सात महिन्यांचे पोटातील बाळही अपघातात दगावले. रिक्षाचालकासह इतर सर्व गंभीर जखमी असून, त्यांच्यावर उपचार सुरू आहेत. जवाहरनगर पोलिसांनी घटनास्थळी धाव घेतली तेव्हा कार घटनास्‍थळीच नुकसान होऊन थांबली होती. चालक आणि कारमधील ३ तरुणी जखमींना मदत न करता पसार झाल्या होत्या. कारचालक कश्यप पटेलला पोलिसांनी शोध घेऊन अटक केली. तो प्लाऊडचा व्यवसाय करतो. तो पुतणीचे गॅदरिंग संपवून तिला आणि तिच्या दोन मैत्रीणींना घेऊन लाँग ड्राइव्हवर गेला होता. झाल्टा फाटा, केंब्रीज चौकमार्गे शहरात परतताना मोंढा नाका उड्डाणपुलावर त्याने जास्तच वेग वाढवला आणि हसत्या खेळत्या कुटुंबाचा सर्वनाश घडवला.  पटेलला न्यायालयात हजर केल्यानंतर २३ डिसेंबरपर्यंत पोलीस कोठडी सुनावण्यात आली. अधिक तपास पोलीस उपनिरीक्षक मारोती खिल्लारे करत आहेत.