छत्रपती संभाजीनगर (मेट्रोपोलिस पोस्ट वृत्तसेवा) : नशेखोराने खासगी कंपनीतील कामगार तरुणावर चाकूचे वार करत लुटले. यात तरुण जखमी झाला असून, त्याचे ५ हजार रुपये नशेखोराने नेले. ही घटना चिकलठाणा एमआयडीसीतील साई चौक पावरलूमजवळ रविवारी (११ जानेवारी) रात्री आठला घडली.
भूषण परमेश्वर सूरडकर (वय २१, रा. ब्रिजवाडी रिक्षा स्टँडजवळ) याने याप्रकरणात तक्रार दिली आहे. तो आई, वडील, भावासह राहतो. हरमन फिनिक्युम लिमिटेड, चिकलठाणा एमआयडीसी येथे नोकरी करतो. प्रसंजित हिवाळे (वय २०, रा. मुकुंदवाडी) हा त्याच्या ओळखीचा असून दोघांत भांडण झाले होते. वाद मित्रांच्या मध्यस्थीने मिटला होता. रविवारी (११ जानेवारी) रात्री आठला भूषण व त्याचा मित्र सुमित मिसाळ हे साई चौक पावरलूम येथे बसलेले असताना प्रसंजित तिथे नशेत आला. जुन्या भांडणाच्या कारणावरून त्याने भूषणला शिवीगाळ केली.
कमरेचा चाकू काढून डोक्यात मारत असताना भूषणने तो हाताने अडवल्यामुळे डाव्या हाताला चाकू लागला. त्यानंतर त्याने चाकूचा धाक दाखवत भूषणच्या पँटच्या बाजूच्या खिशात हात घालून ५ हजार रुपये हिसकावले व जीवे मारण्याची धमकी दिली. नंतर दुचाकीवरून निघून गेला. भूषणच्या खिशात पगाराचे पैसे होते. ते प्रसंजितने हिसकावून नेले. घाटी रुग्णालयात उपचार घेतल्यानंतर भूषणने सिडको एमआयडीसी पोलीस ठाण्यात तक्रार दिली. त्यावरून पोलिसांनी प्रसंजितविरुद्ध गुन्हा दाखल केला आहे. अधिक तपास सहायक पोलीस निरीक्षक कैलास लहाने करत आहेत.
.jpg)
.jpg)
