छत्रपती संभाजीनगर (सीएससीएन वृत्तसेवा) : पहिल्यांदा ठेच लागल्यानंतर दुसऱ्यांदा लग्न करताना खबरदारी घेऊनही विवाहितेच्या नशिबी पुन्हा तेच भोग आले. एक लग्न झालेल्या पुरुषासोबत लग्न केल्यानंतर अवघ्या दोनच महिन्यांनी त्‍यानेही छळ सुरू केला. नोकरीही सोडायला लावली, घटस्‍फोटासाठी दबाव आणू लागला. त्‍याची पत्नी पहिली परत येण्याची भाषा करत होती, तर मामेबहीण मंदिरात आम्‍ही लग्न केल्याचा दावा करत होती. त्‍यामुळे विवाहिता हादरून गेली. घटस्फोट देत नाही म्हणून पतीने तिच्यावर चाकूहल्ला केला. आता तिने सिडको पोलीस ठाणे गाठून पतीसह सासरच्या ६ जणांविरुद्ध तक्रार दिली आहे. त्‍यावरून गुरुवारी (२४ जुलै) पोलिसांनी गुन्हा दाखल केला आहे.
प्रतीक्षा अनिल पगारे (वय ४३, रा. सिंदेगाव, नायगाव रोड, ता. सिन्नर, जि. नाशिक, ह. मु. एन ७ सिडको) यांनी या प्रकरणात तक्रार दिली आहे. त्‍या आईकडे आठ महिन्यांपासून राहतात. त्‍यांचे पती अनिल विष्णू पगारे यांचा पहिल्या पत्नीसोबत घटस्फोट झालेला आहे. प्रतीक्षा यांचा सुद्धा पहिल्या पतीसोबत घटस्फोट झालेला आहे. ८ जुलै २०१७ रोजी प्रतीक्षा यांचे दुसरे लग्न अनिल पगारे (रा. सिंदेगाव ता. सिन्नर, जि. नाशिक) यांच्यासोबत झाला होता. लग्नानंतर त्‍या सासरी नांदण्यासाठी गेल्या. त्‍यांना पहिल्या पत्नीपासून दोन मुली असून, त्‍या त्यांचा साभाळ करत होत्‍या. सासरचे लोक
पती अनिल, सासू लक्ष्मी विष्णू पगारे, अनुष्का अनिल पगारे (सावत्र मुलगी), रत्ना किसन पगारे (आतेसासू, सर्व रा. सिंदेगाव, जि. नाशिक), निर्मला नाना जाधव (मामे नंनद) रा. सातपूर कॉलनी नाशिक, अर्चना नानासाहेब जाधव (घटस्फोटीत सवत) रा. दिंडोरी रोड म्हसरुळ ता. जि. नाशिक यांनी लग्नानंतर प्रतीक्षा यांना दोन महिने चांगले वागवले. नंतर घरगुती कारणावरून वाद करून त्रास द्यायला सुरुवात केली.
शिवीगाळ करायचे. प्रतीक्षा या पुण्यातील एका खासगी बँकेत नोकरी करत होत्‍या. आठ दिवसांमध्ये सासरी येणे-जाणे करायच्या. पती दारू पिऊन मारहाण करून छळ करू लागला. तुला नोकरी करायची असेल तर घरातील सर्व खर्च तूच करायचे. माझ्या मुलीचाही शिक्षणाचा सर्व खर्च तूच करायचा, असे म्हणून त्‍यांना मानसिक व शारीरिक त्रास देत होते. पती व सासू, सावत्र मुलीला प्रतीक्षा यांच्याविषयी एकाचे दोन लावून भांडणे लावून देण्याचे काम संशयित नातेवाइक करायचे. पतीने त्‍यांना नोकरी सोडायला लावली. त्यानंतर प्रतीक्ष यांनी नाशिकमध्ये एका कंपनीत नोकरी केली. पतीला सरकारी नोकरी असताना सुध्दा ते घरात खर्च करत नव्हते. तुझ्या आईचे छत्रपती संभाजीनगर येथील घर विकून फ्लॅटचे कर्ज नील करू व तुझ्या गतिमंद बहिणीला अनाथ आश्रमात टाकू, असे ते प्रतीक्षाला म्‍हणू लागले. त्‍यासाठी शिवीगाळ करून मारहाण केली. घरात उपाशीपोटी ठेवून तीन महिने घरातील स्टोअर रूममध्ये वेगळे ठेवले.
पहिली पत्नी धमकावत होती, एक तिसरी महिलापण धमकावू लागली...पतीची पहिली पत्नी अर्चना जाधवसुद्धा कॉल करून म्हणायची, की तू माझ्या मुलीचा सांभाळ व्यवस्थित करत नाही. मला परत घरात यावे लागेल. तुझा पती नेहमी माझ्या संपर्कात राहतो. मला भेटायला बोलावतो, असे अर्चना सांगत होती. तू घर सोडून निघून जा. नसता मी घरी आल्यावर तुझे बरेवाईट करील, अशी धमकी देत होती. त्यानंतर सन २०२२ मध्ये पतीची मामे बहीण निर्मला नाना जाधव हिने प्रतीक्षाला कॉल करून सांगितले, की मी तुझ्या पतीसोबत मंदिरात लग्न केले आहे. तू त्याच्याकडे कसे काय राहते, असे म्हणून तिनेही शिवीगाळ करून मारहाण करण्याची धमकी दिली.
घरातून जात नाही म्हणून जीवघेणा हल्ला
२१ ऑक्‍टोबर २०२४ रोजी प्रतीक्षा यांना पती, सासू व सावत्र मुलगी यांनी घरातून हाकलून दिले. त्‍या माहेरी छत्रपती संभाजीनगर येथे आल्या असता पतीने फारकतीची नोटीस त्‍यांना व्हॉटस्‌ ॲपवर पाठविली. त्‍यामुळे ३० नोव्‍हेंबर २०२४ रोजी त्‍या सासरी गेल्या. तेव्हा पतीने धमकावले, की तू फारकती दे, नसता तुला जिवंत सोडणार नाही. हाताचापटाने लाथाबुक्‍क्‍यांनी मारहाण करून चाकूने उजव्या पायाच्या मांडीवर मारून प्रतीक्षा यांना जखमी केले. अधिक तपास पोलीस अंमलदार ज्ञानोबा जोमदे करत आहेत.
.jpg)
