‘रिपाइं’च्या मराठवाडा उपाध्यक्षावर जीवघेणा हल्ला!; चालकाच्या सतर्कतेमुळे प्राण बचावले, सिडको वाळूज महानगरातील धक्कादायक प्रकार, हल्लखोरांना अटकेसाठी पोलीस ठाण्यासमोर कार्यकर्ते आक्रमक

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : रिपाइंच्या आठवले गटाचे मराठवाडा उपाध्यक्ष कुंदन लाटे यांच्यावर  जीवघेणा हल्ला झाला आहे. त्यांच्याकडे बंदूक होती, असा संशय आहे. चालकाने सतर्कतेने वाहन पुढे नेल्याचे तिघांनी गाडीवर दगडफेक केली. ही घटना साउथ सिटी सिडको महानगर-२ गेटजवळ शुक्रवारी (७ नोव्‍हेंबर) पहाटे १२ वाजून ४३ मिनिटांनी (मध्यरात्री) घडली. घटनेचा व्हिडीओ सोशल मीडियावर व्हायरल झाला. हल्लेखोरांना तातडीने अटक करून कठोर कारवाई करावी, या मागणीसाठी दुपारी दोनला वाळूज एमआयडीसी पोलीस ठाण्यासमोर पक्षाच्या पदाधिकारी, कार्यकर्त्यांनी निषेध आंदोलन केले.

लाटे हे जालन्यातील बैठक संपवून घरी परतत होते. गाडीत जिल्हाध्यक्ष बालकृष्ण इंगळे हेही होते. आधी साउथ सिटी प्रवेशद्वारावर गाडी अडविण्याचा प्रयत्न झाला. मात्र, चालकाने गाडी न थांबवता पुढे नेली. याचवेळी २ हल्लेखोर कारसमोर आले. त्यांच्या हातात बंदूक असल्याचा संशय आहे. मात्र चालकाने गाडी थांबवली नाही. त्यामुळे चिडून तिन्ही हल्लेखोरांनी दगडफेक करत गाडीचे नुकसान केले. याघटनेमुळे राजकीय वर्तुळात खळबळ उडाली. दुपारी दोनला लाटे यांनी वाळूज एमआयडीसी पोलीस ठाण्यात वरिष्ठ पोलीस निरीक्षक रामेश्वर गाडे यांच्याकडे तक्रार दिली. लाटे यांनी गुरुवारी सकाळीच जिवाला धोका असल्याची लेखी तक्रार पोलिसांकडे दिली होती.

त्यानंतर काही तासांतच हल्ला झाला आहे. त्यामुळे हल्ला करणारे कोण व कोणत्या कारणास्तव त्यांनी हल्ला केला, असा प्रश्न निर्माण झाला आहे. घटनेच्या व्हिडीओत दोन हल्लेखोर लाटे यांच्या गाडीला आडवे येत हल्ला करताना दिसत आहेत. पक्षाचे शेकडो कार्यकर्ते, पदाधिकाऱ्यांनी पोलीस ठाण्यासमोर जोरदार आंदोलन केले. हल्लेखोरांना तात्काळ अटक करण्याची मागणी केली. आंदोलनात प्रदेशाध्यक्ष बाबुराव कदम, मिलिंद शेळके, दौलत खरात, दीपक निकाळजे, संजय ठोकळ, बाळकृष्ण इंगळे, सुखदेव सोनवणे, गौतम मोरे, चेतन सोनवणे, काका कोळसे, शरद कीर्तीकर, भीमराव मोरे, विशाल काळे आदींचा सहभाग होता. वरिष्ठ पोलीस निरीक्षक गाडे यांनी आंदोलनकर्त्यांची भेट घेत हल्लेखोरांना लवकरच अटक करण्यात येईल, असे आश्वासन दिले.