छत्रपती संभाजीनगरमध्ये विद्यार्थ्यानेच रचला डेंटल कॉलेजच्या बदनामीचा कट!; पोलिसांच्या चौकशीत समोर आले धक्कादायक कारण... 

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : छत्रपती संभाजीनगर शहरातील छत्रपती शाहू महाराज शिक्षण संस्थेच्या दंत महाविद्यालयाच्या बदनामीचा ई-मेल अंतिम वर्षातील विद्यार्थ्यानेच महाराष्ट्र आरोग्य विज्ञान विद्यापीठ, नाशिक यांना केला. त्यामुळे महाविद्यालय प्रशासन हादरून गेले. चौकशीत हा ई-मेल ज्याने केला, त्या विद्यार्थ्याला पोलिसांनी विचारले असता त्याने कमी हजेरीमुळे अंतिम वर्षाच्या परीक्षेला मुकावे लागण्याच्या भीतीने  महाविद्यालयात त्रास होत असून आत्महत्या करावी वाटते, असा इ-मेल केल्याचे सांगितले.

खान तासीम सरताज मोहंमद (रा. मंजूरपुरा, छत्रपती संभाजीनगर) असे या विद्यार्थ्याचे नाव असून, त्याच्याविरुद्ध उपप्राचार्य डॉ. सदाशिव डावकर यांच्या तक्रारीवरून सातारा पोलिसांनी गुन्हा दाखल केला आहे. छत्रपती शाहू महाराज शिक्षण संस्थेचे दंत महाविद्यालय नक्षत्रवाडीत आहे. विद्यापीठ, पोलीस व महाविद्यालयाच्या संयुक्त चौकशीत तासीमने बदनामीच्या उद्देशाने हे कृत्य केले. पोलीस निरीक्षक कृष्णा शिंदे यांनी या घटनेची माहिती पत्रकारांना दिली. दंत महाविद्यालयाला महाराष्ट्र आरोग्य विज्ञान विद्यापीठाचे पत्र प्राप्त झाले. त्यात एका विद्यार्थ्याने महाविद्यालयाची तक्रार करणारा इ-मेल केला असून त्यात मानसिक तणावामुळे आत्महत्या करत असल्याचे नमूद आहे.

महाविद्यालयाचे वातावरण नकारात्मक आहे. स्टाफ चांगली वागणूक देत नाही. ते त्रास देतात. हॉस्पिटलमध्ये कुणी रुग्ण नसतात. आर्थिक व मानसिक तणाव निर्माण करतात. त्यामुळे सर्व विद्यार्थ्यांना त्रास होतो म्हणून आत्महत्या करावी वाटते, असे इ-मेलमध्ये तासीमने म्हटले होते. महाविद्यालयाच्या प्रशासनाने पोलिसांकडे धाव घेतली. त्यानंतर पोलिसांनी या प्रकरणाची चौकशी केली. त्यात तो महाविद्यालयाचाच विद्यार्थी असून मंजूरपुरा भागात राहत असल्याचे समोर आले. चौकशीत त्याने कबूल केले, की तो चतुर्थ वर्षात शिकत असून, अनुपस्थितीमुळे परीक्षेला बसता येणार नसल्याने असा प्रकार केल्यावर परीक्षेला बसता येईल, असे त्याला वाटले. पण पोलिसांच्या तपासात त्याचे बिंग फुटले.