छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : उद्योगपती अझीम प्रेमजी यांच्या नावाने असलेल्या ॲपवरून गुंतवणुकीची रिक्वेस्ट पाठवून आणि दामदुप्पट परताव्याचे आमिष दाखवून छत्रपती संभाजीनगरच्या उद्योगपतीला तब्बल ७३ लाखांना गंडा घातला गेला आहे. विशेष म्हणजे या उद्योगपतीकडून उकळण्यात आलेली रक्कम थेट बीडच्या बँक खात्यात जमा झाली होती.
या प्रकरणात उद्योगपती संतोष शहा (वय ५७, रा. एन २ सिडको) यांनी मुकुंदवाडी पोलीस ठाण्यात तक्रार दिली आहे. त्यांना व्हॉटस् अॅपवर ८ जुलै रोजी उद्योगपती अझीम प्रेमजी यांच्या नावाने असलेल्या कंपनीत गुंतवणुकीबद्दल विचारणा करण्यात आली. त्यानंतर ११ सप्टेंबरला तन्वी देशपांडे नावाच्या तरुणीने त्यांना कॉलही केला. कंपनीची माहिती देत तन्वीने शहा यांना १०६-प्रेमजी इन्व्हेस्टमेंट नावाच्या व्हाटस अॅप ग्रुपमध्ये सहभागी करून घेतले. त्या तरुणीच्या सांगण्यावरून शहा यांनी प्रेमजी इन्व्हेस्ट हे ॲप देखील डाऊनलोड केले. इतरांना तब्बल दुप्पट परतावा मिळत असल्याचे पाहून शहा यांनी कोणताही विचार न करता ३० लाखांची गुंतवणूक केली. नंतर आणखी ४३ लाख असे एकूण ७३ रुपये गुंतवले. यानंतर शहा हे स्वत:च्या कंपनीच्या कामानिमित्त विदेशात गेले.
तेथून परतल्यानंतर त्यांनी गुंतवलेल्या पैशांची किंमत किती वाढली, हे तपासण्यासाठी कंपनीच्या खऱ्या वेबसाईटला भेट दिली. त्यानंतर त्यांना धक्काच बसला. सायबर भामट्यांनी अझीम प्रेमजी इन्व्हेस्टमेंटची बनावट वेबसाईट करून गंडा घातला होता. शहा यांनी भामट्यांना व्हॉट्स ॲप कॉल केला असता उचलला गेला नाही. आपण ७३ लाखांना फसवलो गेल्याचे लक्षात येताच त्यांनी मुकुंदवाडी पोलिसांत तक्रार नोंदवली. पोलिसांनी फसवणुकीचा गुन्हा दाखल केला आहे. शहा यांनी गुंतवलेले बहुतांश पैसे बीडच्या बँकेतील वेगवेगळ्या खात्यांत जमा झाल्याचे पोलीस तपासात समोर आल्याने पोलीस चक्रावले आहेत. या पैशांचे तब्बल ८०० व्यवहार होऊन ते पैसे पुढे पुढे जात राहिल्याचेही तपासात दिसून आले.
.jpg)
.jpeg)
