छत्रपती संभाजीनगर (मेट्रोपोलिस पोस्ट वृत्तसेवा) : शहरात कामानिमित्त आलेल्या दोन तरुणांवर अचानक दोन नशेखोरांनी चाकूहल्ला केला. या हल्ल्यात एक तरुण छाती आणि पोटात चाकूचे वार लागल्याने गंभीर जखमी झाला आहे. ही थरारक घटना सोमवारी (२४ नोव्हेंबर) दुपारी अडीचला अदालत रोडवर पगारिया बजाज शोरूमच्या बाजूला घडली.
फेब्रिकेशन व्यावसायिक विजय गोरख साळुंके (वय २१, रा. मांगेगाव ता. गंगापूर) याने याप्रकरणात तक्रार दिली आहे. सोमवारी (२४ नोव्हेंबर) दुपारी अडीचला तो व त्याचा मित्र गौरव संजय मावस (वय २३, रा. मांगेगाव ता. गंगापूर) बाबा पेट्रोलपंप चौकातून अदालत रोडने कोर्टाकडे पायी येत होता. पगारिया बजाज शोरूमच्या बाजूला फूटपाथवर समोरून दोन जण पायी येत होते. त्यातील एक जण अचानक विजय आणि गौरवकडे आला. जवळील चाकू काढून गौरवच्या छातीत वार केला. पुन्हा चाकूने दुसरा वार पोटात करून गंभीर जखमी केले.
त्यानंतर तो व त्याचा साथीदार बाबा पेट्रोलपंपाच्या दिशेने पळून गेले. चाकूने वार करणाऱ्याने अंगात काळे जरकिन व काळी पँट घातलेली होती. त्याचा बांधा सडपातळ होता व उंची अंदाजे ५ फूट ६ इंच, केस वाढलेले अंदाजे वय २५ वर्षे, त्याच्यासोबतचा तरुण सडपातळ बांधा असलेला त्याने अंगात टी शर्ट घातलेला व केस कुरळे असलेला अंदाजे ५ फूट ६ इंच उंची असलेला होता. विजयने गौरवला तातडीने घाटी रुग्णालयात दाखल केले. सीसीटीव्ही फूटेजद्वारे पोलीस हल्लेखोरांचा शोध घेत आहेत. नशेखोरांकडूनच हा प्रकार झाल्याचा संशय आहे. अधिक तपास पोलीस उपनिरीक्षक किशोर तनपुरे करत आहेत.
.jpg)
.jpeg)
