छत्रपती संभाजीनगर (मेट्रोपोलिस पोस्ट वृत्तसेवा) : औरंगपुऱ्यातील शिवसेना भवनसमोर चाकूहल्ला करून जखमी केल्याप्रकरणी न्यायालयाच्या आदेशावरून क्रांती चौक पोलिसांनी पिता-पुत्राविरुद्ध रविवारी (३० नोव्हेंबर) गुन्हा दाखल केला आहे. मनीष गोपीचंद बाखरिया (वय ३०, रा. नंदनवन कॉलनी) यांनी अनिरुद्ध विवेक जैस्वाल (वय ३१) आणि विवेक लक्ष्मण जैस्वाल (वय ५७, रा. कुंभारवाडा) यांच्याविरुद्ध पोलीस गुन्हा दाखल करत नसल्याने न्यायालयात धाव घेतली होती.
हल्ल्याची घटना ११ ऑक्टोबरला सायंकाळी सहाच्या सुमारास घडली होती. तक्रारीनुसार, मनीष हे दुचाकीने मोबाइल दुरुस्तीसाठी औरंगपुऱ्यातून पैठण गेटकडे जात असताना अनिरुद्ध जैस्वाल याने मागील भांडणामुळे रस्त्यात अडवले. जीवे मारण्याच्या उद्देशाने चाकू हल्ला केला. हा हल्ला हातावर लागला. त्यानंतर दोघांत झटापट झाली. गर्दी जमली. त्यांनी मनीष यांना अनिरुद्धच्या तावडीतून सोडवले. त्यानंतर मनीष हे सिटी चौक पोलीस ठाण्यात गेले. मात्र पोलिसांनी मेडिकल मेमो देऊन घाटी रुग्णालयात पाठवले. त्यानंतर क्रांती चौक पोलिसांनी हल्लेखोरासोबत संगणमत करून मनीष यांनाच घाटी रुग्णालयातून अटक केली होती, असे तक्रारीत म्हटले आहे. त्यानंतर मनीष यांनी न्यायालयात धाव घेतली होती. न्यायालयाने मनीष यांच्या तक्रारीवरून गुन्हा दाखल करण्याचे आदेश दिल्याने अखेर रविवारी गुन्हा दाखल करण्यात आला आहे. अधिक तपास पोलीस उपनिरीक्षक किशोर तनपुरे करत आहेत.
.jpeg)
.jpeg)
