हर्सूल टी पॉइंटजवळ जुगार अड्ड्यावर छापा, ६ जुगारी पकडले

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : शहर गुन्हे शाखेने हर्सूल पोलीस ठाण्याच्या हद्दीतील जुगार अड्ड्यावर छापा मारून ६ जुगाऱ्यांना रंगेहात पकडले. त्यांच्याकडून १ लाख ४ हजार रुपयांचा मुद्देमाल जप्त करण्यात आला आहे. ही कारवाई रविवारी (९ नोव्हेंबर) रात्री साडेसातच्या सुमारास करण्यात आली.

शहर गुन्हे शाखेचे पोलीस अंमलदार सागर पांढरे यांनी या प्रकरणात तक्रार दिली आहे. रविवारी (९ नोव्हेंबर) सायंकाळी पावणेसहाला पोलीस उपनिरीक्षक अर्जुन कदम यांनी सागर पांढरे यांच्यासह पोलीस अंमलदार गुप्ता, साळुंखे, काळे, गित्ते, सागरे यांना बोलावून घेतले आणि सांगितले, की गुप्त बातमीदारामार्फत माहिती मिळाली आहे की, हर्सूल टी पॉइंटनजीक स्मशानभूमीच्या बाजूला वळू संगोपण केंद्राच्या पडीत जागेत काही जण पैसे लावून तिर्रट नावाचा जुगार खेळ खेळत आहेत. त्यानंतर सर्व जण तिथे छापा मारण्यासाठी रवाना झाले. सायंकाळी सहाला ते हर्सूल टी पाइंटजवळील वळू संगोपन केंद्राच्या पडीत जागेवर सायंकाळी साडेसातच्या सुमारास पोहोचले.

तिथे एकूण ६ जण गोलाकार बसून जुगार खेळत होते. पोलिसांनी अचानक हल्लाबोल केल्याने त्यांनी पळापळ सुरू केली. मात्र पोलिसांनी सर्वांना पत्ते व पैशासह जागीच पकडले. विशाल सुरेश वाकेकर (वय ३२, रा. पंचशील चौक, एकतानगर), गोपाल काकासाहेब जगताप (वय ३०, रा. राधास्वामी कॉलनी, हर्सूल), रोहीत कैलास आघाडे (वय २४, रा. अंबिकानगर, हर्सूल), तौसीफ खान कलीम खान (वय ३३, रा. यश हॉटेलमागे, मेहमूदपुरा, हडको कॉर्नर), वसीम खान युसूफ खान (वय २४, रा. शरीफ कॉलनी, रोशन गेट), रशीद खान सांडू खान (वय ३९, रा. कोलठाणवाडी रोड, फकीरवाडी, हर्सूल) अशी या जुगाऱ्यांची नावे समोर आली. त्यांच्या ताब्यातून मोबाइल, रोख रक्कम, पत्ते असा एकूण १ लाख ४ हजार रुपयांचा मुद्देमाल जप्त करण्यात आला. सर्व जुगाऱ्यांना हर्सूल पोलिसांच्या ताब्यात देण्यात येऊन त्यांच्याविरुद्ध गुन्हा दाखल करण्यात आला. अधिक तपास पोलीस अंमलदार शकील शेख करत आहेत.