छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : शाळा सुटल्यानंतर ३ वर्षीय चिमुकलीला ५५ वर्षीय नराधम घेऊन जायचा आणि अनैसर्गिक अत्याचार करायचा. मंगळवारी (१४ ऑक्टोबर) दुपारी चिमुकलीने आईला सांगितल्यानंतर हा धक्कादायक प्रकार समोर आला. मुलीच्या आईने वेदांतनगर पोलीस ठाण्यात धाव घेतली. त्यानंतर पोलिसांनी नराधमाविरुद्ध गुन्हा दाखल करत अटक केली आहे. त्याला न्यायालयात हजर केले असता १८ ऑक्टोबरपर्यंत पोलीस कोठडी सुनावण्यात आली.
विजय हरिदास जीवनवाल (वय ५५, रा. पदमपुरा) असे नराधमाचे नाव असून, तो ट्युशन घेतो. महिलेला ३ वर्षांची मुलगी व ५ वर्षांचा मुलगा असून ते दोघेही एकाच शाळेत शिकतात. मुलीची शाळा दुपारी १२:३० वाजता, तर मुलाची १ वाजता सुटते. दोघांना एकाचवेळी शाळेतून घरी आणण्यासाठी महिला १ वाजता शाळेत जाते. या अर्ध्या तासात जीवनवाल मुलीला गाठून सोबत घेत अनैसर्गिक कृत्य करायचा. मंगळवारी दुपारी महिला नेहमीप्रमाणे मुला-मुलीला शाळेतून घरी घेऊन आली. जेवण करत असताना मुलीने त्यांना एक अंकल रोज सोबत नेऊन गुदगुदी करत असल्याचे सांगितले.
महिलेने तिला विश्वासात घेऊन विचारपूस केली असता तिने जीवनवाल करत असलेले कृत्य करून दाखवले. त्यामुळे महिला संतप्त झाली. तिने ही बाब पतीला सांगितली. त्यांनी लगेचच शाळा परिसर गाठला. दुरूनच मुलीने जीवनवालला दाखवले. जीवनवाल हा ओळखीचाच निघाला. त्यानंतर मुलीच्या आईने मुलीला घेऊन वेदांतनगर पोलीस ठाणे गाठले. मंगळवारी रात्री दोनपर्यंत कुटुंबीय पोलीस ठाण्यात ठाण मांडून होते.
वीजपुरवठा खंडीत झाल्याने गुन्हा दाखल करण्यास पहाटेचे तीन वाजून गेले होते. नराधम विजय अपघातामुळे पायाला फ्रॅक्चर झाल्याने लंगडत चालतो. त्याच्या हाताला सध्या काही काम नाही. तो मुलगी शिकत असलेल्या शाळेजवळच राहतो. त्याने मुलगी शाळेतून कधी बाहेर येते, तिची आई तिला केव्हा घ्यायला येते हे हेरून ठेवले होते. त्यानुसार साडेबारा ते १ या वेळेतच तो मुलीला गाठून सोबत नेत अनैसर्गिक कृत्य करायचा. विशेष म्हणजे, शाळेच्या शिक्षकांना ही बाब कशी लक्षात आली नाही, असा प्रश्न निर्माण झाला आहे.
.jpeg)
