१ महिन्याचा पगार दिला नाही, उलट गुंडांकरवी कामगारांना झोडपले!; चिकलठाणा MIDC तील GeBBS कंपनीत काय घडलं...

छत्रपती संभाजीनगर (मेट्रोपोलिस पोस्ट वृत्तसेवा) : १ महिन्याचा राहिलेला पगार घ्यायला आलेल्या ५ कामगारांवर कंपनी सुपरवायझरने गुंडांसोबत मिळून बेदम मारहाण केली. यात एक कामगार गंभीर जखमी झाला आहे. घाटी रुग्णालयात उपचार घेतल्यानंतर त्‍याने सिडको एमआयडीसी पोलीस ठाण्यात तक्रार दिली. त्‍यावरून पोलिसांनी सुपरवायझरसह ३ गुंडांविरुद्ध गुन्हा दाखल केला आहे. ही घटना चिकलठाणा एमआयडीसीतील GeBBS कंपनीत गुरुवारी (१६ ऑक्‍टोबर) दुपारी २ ला घडली.

ज्ञानेश्वर गणपत खोतकर (वय २९, रा. विठ्ठल रुख्माई मंदिरासमोर, मुकुंदवाडी) यांनी याप्रकरणात तक्रार दिली आहे. ते चिकलठाणा एमआयडीसीतील GeBBS कंपनीत २५ सप्‍टेंबरपर्यंत कंत्राटी कामगार होते. कंपनीकडे त्‍यांचे व त्‍यांच्या सहकाऱ्यांचे १ महिन्याचे पेमेंट बाकी होते. गुरुवारी दुपारी २ ला खोतकर, त्यांचे सहकारी दिनेश पठाडे, दीपक जाधव, चंद्रकांत हिंगोले, गौतम नगराळे हे GeBBS कंपनीत ठेकेदार विष्णू जगताप यांच्याकडे राहिलेले एक महिन्याचे पेमेंट घेण्यासाठी आले. जगताप यांनी कंपनीच्या गेटवर थांबायला सांगितले. त्यामुळे सर्वजण गेटबाहेर बाजूला उभे होतो.

तेव्हा तिथे कंपनीचा सुपरवायझर संदीप पटेकर (रा. सिंदीबन, चिकलठाणा) व त्याच्यासोबत तीन अनोळखी व्यक्ती आले. तुम्ही कंपनीच्या गेटवर का थांबले, असे म्हणून त्याने व त्‍याच्या साथीदारांनी ज्ञानेश्वर खोतकर आणि अन्य कामगारांना हाताचापटाने मारहाण करायला सुरुवात केली. त्यामुळे खोतकरवगळता बाकी कामगार पळून गेले. ते खोतकरांना घेरून मारहाण करत असताना त्यातील एकाने लाकडी दांड्याने दोन्ही पायाच्या पोटरीवर व उजव्या डोळ्याच्या वर मारून जखमी केले. खोतकर यांनी घाटी रुग्णालयात उपचार घेतल्यानंतर सिडको एमआयडीसी पोलीस ठाणे गाठून तक्रार दिली. त्यावरून पटेकर व त्‍याच्या ३ साथीदारांविरुद्ध पोलिसांनी गुन्हा दाखल केला आहे. अधिक तपास पोलीस अंमलदार अरविंद मेने करत आहेत.