छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : बाजारपेठेतून पोलिसांनी दोनदा धिंड काढली. लोक हसले. त्यामुळे कुख्यात गुन्हेगार टिप्या ऊर्फ जावेद मसूद शेख याची पुरती इज्जत गेली, दहशत संपली. पोलिसांचं लोकांनी कौतुक केलं. अपमान असह्य झालेल्या टिप्याचे मानसिक संतुलन हरवले आहे. यातूनच त्याने पुन्हा एकदा पोलिसांवर हल्ला केला. कोर्टात तारखेला हजर करून कारागृहात सोडताना सोमवारी (१३ ऑक्टोबर) दुपारी ३ वाजता हा प्रकार घडला. त्याच्याविरुद्ध हर्सूल पोलीस ठाण्यात गुन्हा दाखल करण्यात आला आहे.
टिप्याने २ ऑगस्ट रोजी मध्यरात्री व्यापारी शेख अझर (वय ४०, रा. गारखेडा) यांना टिप्याने तलवारीचा धाक दाखवून लुटले होते. अझर यांची दुचाकी ताब्यात घेत अडीच लाख रुपये लुटून नेत वर १ लाख रुपयांची खंडणीदेखील मागितली होती. पुंडलिकनगर पोलीस त्याला शोधत असताना तो २६ ऑगस्ट रोजी थेट न्यायालयात हजर झाला होता. त्यानंतर पुंडलिकनगरचे पोलीस निरीक्षक अशोक भंडारे यांनी ९ सप्टेंबरला त्याला हर्सूल कारागृहातून ताब्यात घेत अटक केली होती. घटनास्थळ पंचनाम्याच्या निमित्ताने टिप्याची पोलिसांनी गारखेडा, भरतनगर, साईनगरमधून दोन वेळा धिंड काढली. त्यावेळी त्याने चालण्यास नकार दिला असता, पोलिसांनी अक्षरशः उचलून वरात काढली. हा अपमान टिप्याला अजूनही खात आहे. त्याचे मानसिक संतुलन हरवल्याचे दिसून येत आहे.
पोलिसांनी मोक्का कायदा लावल्याचे कळल्याने आता जेलमधून आपली सुटका होणे अशक्य असल्याचे कळल्याने टिप्या बिथरला आहे. न्यायालयातून बाहेर पडताच त्याने पोलिसांसोबत वाद घालायला सुरुवात केली. दुपारी दोनला त्याला हर्सूल कारागृहात आणले. त्याने गेटवरच गोंधळ घालायला सुरुवात केली शिवीगाळ करून कारागृहात जाण्यास नकार देऊ लागला. पोलीस उपनिरीक्षक कैलास यांच्यावर हल्ला केला. जाधव यांची कॉलर पकडून बाहेर आल्यावर तुला बघून घेतो, असे धमकावले. अखेर जास्तीचा पोलीस बंदोबस्त मागवून त्याला प्रसाद देत कारागृहात डांबण्यात आले.
कोण आहे टिप्या...टिप्या अल्पवयीन असल्यापासूनच गुन्हेगारी क्षेत्रात आहे. पूर्वी तो पोलिसांना गुन्ह्याविषयी माहिती देत असायचा. म्हणजेच खबऱ्या म्हणून काम करायचा. गुन्हे करता करता पोलिसांना इतर गुन्हेगारांची टिपही देत होता. टिप्याकडून पोलिसांना गुन्ह्यांची माहिती मिळत असे म्हणून त्याच्या गुन्ह्यांकडे पोलिसांनीही सुरुवातीच्या काळात दुर्लक्ष केले. बघता बघता टिप्या अट्टल गुन्हेगार झाला. नंतरच्या काळात टिप्याने पोलिसांसमोर आव्हान निर्माण केले. त्याच्याविरुद्ध लुटमार, खंडणी, दंगल, विनयभंग, पोलिसांवर हल्ला असे २५ हून गंभीर गुन्हे दाखल आहेत. कारागृहाबाहेर पडताच त्याची गुन्ह्यांची मालिका सुरू होते. त्याला व त्याच्या टोळीला काही अवैध व्यावसायिकांनी पोसले होते. टिप्या विजयनगरात राहतो. त्याची विजयनगर, पुंडलिकनगर परिसरात दहशत आहे. काही वर्षांपूर्वीही कारागृहाबाहेर पडल्यानंतर पुंडलिकनगर रस्त्यावर मैत्रिणीच्या वाढदिवसाचे त्याने सेलिब्रेशन केले होते, ज्याची पूर्ण शहरात चर्चा झाली होती. हातात बिअरची बाटली, सिगारेट घेऊन तो मैत्रिणीसोबत कारवर नाचला होता. त्यावेळी त्याची ही मैत्रिण पुणे जिल्ह्यातील तत्कालिन डीवायएसपींची मुलगी असल्याचे समोर आले होते. टिप्याविरुद्ध ४ जणांच्या खुनाचे आरोप आहेत. नोव्हेंबर २०१८ मध्ये दुचाकीला साईड न दिल्याच्या कारणावरून त्याने चाकूने भोसकून एकाची हत्या केली होती. एका पोलीस उपनिरीक्षकांच्या अंगावर कार घालून जीवे मारण्याचा प्रयत्नही त्याने केला होता. तो स्वतःला संभाजीनगरचा किंग म्हणवतो. त्याचे साथीदार त्याचे व्हिडीओ तयार करतात. टिप्याने हातावरही मौत असे गोंदवून ठेवले आहे. त्याच्या मोबाइलच्या क्रमांकाचेही शेवटचे आकडे ३०२ असतात, एवढेच नाही तर त्याच्या गाडीचा क्रमांकही ३०२ आणि गाडीसमोर मौत असे लिहिलेले असल्याचे सूत्रांनी सांगितले.
.jpg)
.jpg)
