‘समृद्धी’वर भाईगिरीची रील; १६ टवाळखोरांविरुद्ध गुन्हा दाखल, ५ जणांच्या मुसक्या आवळल्या!, शहर गुन्हे शाखेची कारवाई

छत्रपती संभाजीनगर (सीएससीएन वृत्तसेवा) : माळीवाड्याजवळ समृद्धी महामार्गावर वाहने उभी करून १६ टवाळखोरांनी हातात बंदुकी घेऊन रील तयार केली. पोलिसांपर्यंत ही रील पोहोचताच १२ तासांत त्‍यांना बेड्या ठोकण्यात आल्या. पाच जणांची तुरुंगात रवानगी करण्यात आली. मंगळवारी (१६ जुलै) गुन्हे शाखेने जिन्सी भागात ही कारवाई केली.

शेख हमीद शेख हबीब, शेख अफताब शेख कादर, शेख आश्पाक शेख कादर (तिघेही रा. रेंगटीपुरा), आदिल तंबोली ऐजाज (रा. जिन्सी) व सुमित सुभाष अवलकर (रा. संजयनगर) अशी अटक केलेल्यांची रीलबहाद्दरांची नावे आहेत. पोलीस उपायुक्त प्रशांत स्वामी, सहायक पोलीस आयुक्त धनंजय पाटील यांनी कारवाईचे आदेश दिले होते. पोलीस निरीक्षक संदीप गुरमे, पोलीस उपनिरीक्षक प्रवीण वाघ यांनी रीलमधील टवाळखोरांची माहिती मिळवत त्यांच्या घरी छापे मारले.

पोलीस अंमलदार परभत म्हस्के, विजय भानुसे, मनोहर गिते, संतोष भानुसे, ज्ञानेश्वर पवार यांनी ५ जणांच्या मुसक्या आवळल्या. हमीद, अफताबसह एकूण १६ जणांनी मिळून समृद्धी महामार्गावर ही रील तयार केली होती. रस्त्याच्या मधोमध दुचाकी उभ्या करून रस्ता व्यापून ते गाण्याच्या तालावर चालत आहेत. दोघांच्या हातात बंदुकी असून, सोबतचे दहा ते बारा टवाळखोर मागे चालत आहेत. बॅकग्राऊंडला धमक्‍यांचे बोल असलेले गाणे आहे.

पिस्तुल केले गायब…
पोलीस आपल्यापर्यंत पोहोचणार असल्याची कुणकुण हमीदला लागताच त्याने त्याच्याकडील दोन्ही पिस्तुले लपवली आहेत. पिस्तुलासह त्यांच्या साथीदारांचा शोध सुरू असल्याचे पोलीस उपनिरीक्षक कृष्णा घायाळ यांनी सांगितले.

दोघे अट्टल गुन्हेगार…
हमीदचे इन्स्टाग्राम अकाउंट व्हेरिफाइड असून, १ लाखाच्या घरात त्याचे फॉलोअर्स आहेत. यापूर्वी सिटी चौक, क्रांती चौक व सिडको पोलीस ठाण्यात मारहाणीचे तीन गुन्हे त्याच्याविरुद्ध दाखल आहेत. आशपाकही गुन्हेगार असून, दौलताबाद पोलीस ठाण्यात त्‍याच्याविरुद्ध मारहाणीचा एक गुन्हा दाखल आहे.