छत्रपती संभाजीनगर (सीएससीएन वृत्तसेवा) : बीड बायपास भागातील महापालिका वॉर्ड कार्यालयात मंगळवारी (२३ जुलै) सकाळी घराचा कर जास्त आल्याने विचारणा करण्यास गेलेल्या वकील महिलेसोबत महापालिकेच्या अभियंत्यासह एकाने अश्लील वर्तन केले. शिवीगाळ करून धमकी दिली. वकील महिलेने सातारा पोलीस ठाण्यात या प्रकरणात तक्रार दिल्यानंतर पोलिसांनी दोघांविरुद्ध गुन्हा दाखल केला. याच प्रकरणात अभियंत्यानेही तक्रार दिली असून, पोलिसांनी वकील महिलेसह तिचा साथीदार गोरख पंढरीनाथ राठोड यांच्याविरुद्ध गुन्हा दाखल केला आहे. राठोड हे एका राजकीय पदाधिकाऱ्याचा बंधू असल्याचे तक्रारीत म्हटले आहे.
वकील महिलेने तक्रारीत काय म्हटलंय…
२६ वर्षीय वकील महिलेने दिलेल्या तक्रारीत म्हटले आहे, की त्या बाळापूर फाटा बीडबायपास भागात राहतात. मंगळवारी सकाळी अकराला त्या देवळाई बीड बायपास भागातील महापालिका वाॅर्ड कार्यालयात घराचा कर जास्त आल्याने विचारणा करण्यासाठी गेल्या होत्या. तेथील अभियंता कृष्णा परभतराव ठोकळ याच्याकडे त्या विचारणा करत असताना तिथे बसलेल्या बाजीराव पांडुरंग हिवाळे याने त्यांना अरेरावी सुरू केली. तो वकील महिलेला म्हणाला, की मी इथला दादा आहे, येथे माझ्या म्हणण्याप्रमाणे काम होते. माझ्या परवानगीशिवाय काही होत नाही. तू येथून बाहेर हो. तू आतमध्ये कशी काय आली… त्याचवेळी अभियंता ठोकळ हा म्हणाला की, हिला आधी बाहेर काढा.
तेव्हा वकील महिलेने त्यांना मला साहेबांशी माझ्या टॅक्स पावती संबंधाने बोलायचे आहे, असे सांगितले. त्यावर बाजीराव हिवाळे याने त्यांच्या उजव्या हाताला धरून ऑफिसच्या बाहेर काढुन त्यांचा उजवा हात पिरगाळला व डाव्या गालावर थापड मारली. कृष्णा ठोकळ याने अश्लील भाषेत शिवीगाळ करून आपल्याकडे जास्त साक्षीदार आहेत. हिच्यावरच आपण गुन्हा दाखल करू, असे धमकावले. त्यानंतर बाजीराव हिवाळे याने महिला वकिलाच्या शर्टला धरून अश्लील कृत्य केले. मी तुला येथे राहू देणार नाही. येथे कशी राहते ते पाहतो, तुला व तुझ्या परिवाराला जीवे मारून टाकतो, अशी धमकी दिली. कृष्णा ठोकळ याने वकील महिलेला मागून कमरेला पकडले, असे तक्रारीत म्हटले आहे. अधिक तपास पोलीस उपनिरीक्षक भंडारे करत आहेत.
अभियंत्याने तक्रारीत काय म्हटलंय…
दरम्यान, याच प्रकरणात अभियंता कृष्णा परभतराव ठोकळ (५०) यांनीही तक्रार दिली असून, तक्रारीत त्यांनी म्हटले आहे, की ते वरिष्ठ लिपिक तथा प्रभारी स्थापत्य अभियांत्रिकी सहायक म्हणून कार्यरत आहेत. सकाळी अकराला वकील महिला तिथे आली. त्यांनी १ लाख रुपये कर कसा आला, असा प्रश्न केला. त्यावर ठोकळ यांनी तिला सव्वानऊ वर्षांचा थकीत मालमत्ता कर आहे. तुमची तक्रार असेल तर लेखी स्वरूपात अर्ज करा, असे सांगितले.
अभिलेख तपासून नियमाप्रमाणे कर आकारण्यात येईल, असे सांगितले. ठोकळ तिला समजावून सांगत असताना गोरख राठोड केबिनमध्ये शिरला. त्याने मी प्रमोद राठोडचा भाऊ असल्याचे सांगितले व अरेरावी सुरू केली. शिवीगाळ करून गोंधळ घातला. कर भरण्यासाठी आलेले बाजीराव हिवाळे यांनी मध्यस्थीचा प्रयत्न केला असता राठोडने त्यांना धक्काबुक्की केल्याचे तक्रारीत म्हटले आहे. त्यावरून पोलिसांनी वकील महिलेसह गोरख राठोड यांच्याविरुद्ध गुन्हा दाखल केला आहे.
बाजीराव हिवाळे कोण?
दरम्यान, या प्रकरणात वकील महिलेने ज्या बाजीराव पांडुरंग हिवाळेविरुद्ध तक्रार दिली आहे, तो बाजीराव नक्की कोण आहे, त्याचा महापालिकेच्या कार्यालयात संबंध कसा, असा प्रश्न निर्माण झाला आहे. अभियंत्याच्या तक्रारीनुसार, तोही कर भरायला आला आणि त्याने मध्यस्थीचा प्रयत्न केल्याचे म्हटले आहे. पण कोणता सामान्य माणूस कर भरायला आल्यानंतर इतकी टोकाची मध्यस्थी करेल, असाही प्रश्न व्यक्त केला जात आहे. वकील महिलेच्या तक्रारीनुसार, बाजीरावे त्यांना धमकावले, की मी इथला दादा आहे, येथे माझ्या म्हणण्याप्रमाणे काम होते. माझ्या परवानगीशिवाय काही होत नाही… बाजीराव हा महापालिकेतला कोण, याबाबत आता पोलिसांनीही सखोल चौकशी करण्याची गरज निर्माण झाली आहे.
.jpg)
.jpeg)
