पतीचा बाहेरख्यालीपणा असह्य होऊन लग्नाच्या ३ महिन्यांतच चैतालीने केली आत्‍महत्‍या!; प्रेयसी मेघा चौधरीसह पती केतन अन्‌ सासरच्या लोकांविरुद्ध गुन्हा दाखल

छत्रपती संभाजीनगर (सीएससीएन वृत्तसेवा) : पतीच्या विवाहबाह्य संबंधाला कंटाळून पत्नीने लग्नाच्या अवघ्या तीन महिन्यांत गळफास घेऊन आत्‍महत्‍या केल्याची घटना छत्रपती संभाजीनगर शहरातील चिकलठाणा परिसरातील चौधरी कॉलनीत बुधवारी (७ ऑगस्ट) घडली. पोलिसांनी तिला आत्‍महत्‍येस प्रवृत्त केल्याप्रकरणी पती, सासू, सासरे, नणंदेसह पतीच्या प्रेयसीविरुद्ध गुन्हा दाखल केला आहे.

चैताली केतन इंगळे असे आत्महत्या केलेल्या तरुणीचे नाव आहे. तिचे वडील राजेंद्र नारायण तेली (रा.रुपनगर, ता.बोदवड, जि. जळगाव) यांनी या प्रकरणात तक्रार दिली. पती केतन इंगळे, सासरा राजेंद्र इंगळे, सासू कुसुमबाई इंगळे, नणंदा नम्रता व धनश्री, केतनची प्रेयसी मेघा चौधरी (सर्व रा. चौधरी कॉलनी, चिकलठाणा) अशी गुन्हा दाखल झालेल्यांची नावे आहेत. मसाला विक्रेते असलेले चैतालीचे वडील राजेंद्र तेली यांनी तक्रारीत म्‍हटले आहे, की चैतालीचे चौधरी कॉलनीतील केतन इंगळेसोबत २६ एप्रिल २०२४ रोजी बोदवडला थाटामाटात झाले होते. लग्नाच्या दीड महिन्यातच गेल्या १३ जूनला चैतालीला पतीने मारहाण केली.

नणंदेच्या लग्नासाठी माहेरावरून २ लाख रुपये आणण्याची मागणी तिच्याकडे करण्यात आली. याचदरम्यान चैतालीला पतीचा बाहेरख्यालीपणाही कळला. मेघा चौधरीसोबत पती केतनचे प्रेमसंबंध असल्याचे तिला कळल्यावर ती हादरून गेली. तिने याबाबत तिच्या आईलाही सांगितले होते. त्‍यावर आपण केतनला समजावू, असे तिची आई म्‍हणाली होती. केतन हा मेघासोबत चॅटिंग करत असताना चैतालीने अनेकदा पकडले असता त्‍याने चैतालीला मारहाण केली. मेघासोबत ६ वर्षांपासून प्रेमसंबंध असल्याची कबुली दिली व तिच्याशी लग्न करायचे असल्याचेही सांगितले. मेघाला चैतालीने समजावले असता तिने चैतालीलाच मध्ये मध्ये करू नको, अन्यथा जीव गमवावा लागेल, अशी धमकी भरली होती.

७ ऑगस्टला काय घडले?
चैतालीला वडिलांनी ७ ऑगस्टला कॉल केला. पण तिने कॉल घेतला नाही. त्यानंतर चैतालीचे सासरे राजेंद्र इंगळे यांना कॉल केला असता त्यांनीच चैतालीने गळफास घेतल्याचे सांगितले व कॉल कट केल्याचे तक्रारीत राजेंद्र तेली यांनी म्‍हटले आहे. त्‍यांनी दिलेल्या तक्रारीवरून सिडको एमआयडीसी पोलिसांनी आत्महत्येस प्रवृत्त केल्या प्रकरणी पती केतन, सासरा राजेंद्र इंगळे, सासू कुसुमबाई, दोन्ही नणंदा नम्रता व धनश्री आणि पतीची प्रेयसी मेघा चौधरी यांच्याविरुद्ध गुन्हा दाखल केला आहे