छत्रपती संभाजीनगर (सीएससीएन वृत्तसेवा) : घरमालक पुण्याला गेल्याची संधी साधून चोरट्यांनी मोठाच डल्ला मारला. दागदागिन्यांसह ८७ हजार रुपयांची रोकड असा एकूण ११ लाख रुपयांचा ऐवज लंपास केला. ही घटना सातारा परिसरातील श्रीरामनगरात महात्मा ज्योतीबा फुले हौसिंग सोसायटीत ८ ऑगस्टच्या रात्री घडली. १३ ऑगस्टला घरमालकाच्या तक्रारीवरून सातारा पोलिसांनी चोरट्यांविरुद्ध गुन्हा दाखल केला आहे.
अरुण गोपाळराव देशपांडे (वय ७१, रा. ईशसेवा, महात्मा ज्योतिबा फुले हौसिंग सोसायटी, श्रीरामनगर, सातारा परिसर) यांनी चोरीची तक्रार केली आहे. ते कॉस्मो फिल्म कंपनीत नोकरीला होते. सध्या सेवानिवृत्त आहेत. पत्नी आणि आईसह राहतात. मेहुणीची प्रकृती ठीक नसल्याने ८ ऑगस्टला ते कुटुंबीयांसह पुण्याला त्यांना भेटायला गेले होते. रात्री चार ते पाच चोरट्यांनी त्यांचे बंद घर फोडले. गेटवरून उडी मारून आत आले, नंतर सेफ्टी डोअरचे कुलूप तोडून मुख्य दरवाजाचा कोयंडा तोडला. नंतर घरात घुसून बेडरूममधील लाकडी कपाटातील दागदागिन्यांसह ८७ हजार रुपये रोख असा एकूण ११ लाख रुपयांचा ऐवज चोरून नेला.
ही घटना ९ ऑगस्टला दुपारी शेजारील रहिवासी सतीश देशपांडे यांनी अरुण देशपांडे यांना कळवल्यानंतर ते पुण्याहून शहरात आले व सातारा पोलिसाना कळवले. पोलिसांनी घटनास्थळी पाहणी करत पंचनामा केला. ठसेतज्ज्ञ, श्वान पथकालाही घटनास्थळी पाचारण केले होते. १० आॅगस्टला अरुण देशपांडे यांच्या मेहुणीचे पुण्यात निधन झाल्याने ते पोलिसांत लेखी तक्रार न करताच पुण्याला निघून गेले. अंत्यविधी, राख सावडण्याचा विधी पूर्ण करून मंगळवारी (१३ ऑगस्ट) छत्रपती संभाजीनगरला परतले. त्यानंतर सातारा पोलीस ठाण्यात तक्रार दिली. त्यावरून पोलिसांनी चोरट्यांविरुद्ध गुन्हा दाखल केला आहे. अधिक तपास सहायक पोलीस निरीक्षक शैलेश देशमुख करीत आहेत.
.jpg)
.jpeg)
