चोरट्यांचं नशिब फुटकं… गॅस कटरने एटीएम कापत आणले, तितक्यात आग लागली, सर्व नोटा खाक!; छत्रपती संभाजीनगरची घटना

छत्रपती संभाजीनगर (सीएससीएन वृत्तसेवा) : गॅस कटरद्वारे एटीएम फोडत असताना आग लागून १३ लाख ६१ हजार ८०० रुपयांची रोकड जळून खाक झाली. त्‍याचवेळी सायरन वाजायला सुरुवात झाल्याने चोरट्यांनी पळ काढला. ही खळबळजनक घटना सोमवारी (१५ जुलै) पहाटे सव्वा चारच्या सुमारास छत्रपती संभाजीनगर तालुक्यातील माळीवाडा येथे घडली.

माळीवाडा येथील नाशिक मार्गावर भारतीय स्टेट बँकेची शाखा असून, शाखेच्या बाजूलाच एटीएम व सीडीएम मशिन आहे. बँकेकडे सुरक्षारक्षक नाहीत. पांढऱ्या रंगाच्या कारमध्ये तीन ते चार चोरटे आले. त्यांनी कार बँकेसमोर उभी केली. तोंडाला कपडा बांधलेले दोघे एटीएममध्ये शिरले व शटर बंद करून घेतले. त्यातील एकाने एटीएममधील सीसीटीव्ही कॅमेरा तोडला. नंतर गॅस कटरने एटीएम मशिन कापायला सुरुवात केली. मशिनचा समोरचा भाग कापला गेल्यानंतर आतील भाग कापत असतानाच गॅस कटरची ठिणगी पडून एटीएममधील १३ लाख ६१ हजार ८०० रुपयांची रोकड जळू लागली. एटीएममधून धूर निघू लागल्याचे एटीएम केंद्राच्या वरील मजल्यावर राहणारे हिवाळे यांना लक्षात आले. त्यांनी तातडीने बँकेचे शाखा प्रबंधक सोमनाथ सोळंके व पोलिसांना कळवले.

आजूबाजूच्या लोकांना फोन केले. त्‍याचवेळी एटीएममधील सायरन वाजू लागला. ग्रामस्थ एटीएमकडे येत असल्याचे पाहून चोरट्यांनी गॅस कटर मशिन व अन्य साहित्य तेथेच सोडून पळ काढला. चोरट्यांनी जो एक सीसीटीव्ही कॅमेरा तोडला ताे बंदच होता. त्याच्या बाजूला दुसरा डिजिटल कॅमेरा चालू होता. त्‍यात सर्व घटना चित्रीत झाली आहे. पोलिसांनी हे सीसीटीव्ही फुटेज जप्त केले आहे. दौलताबाद पोलीस ठाण्याचे पोलीस निरीक्षक जनार्दन साळुंखे, सहायक पोलीस निरीक्षक संजय गीते, रफीक पठाण, खुशाल पाटील, सुदर्शन राजपूत हे घटनास्थळी येईपर्यंत सर्व रक्‍कम जळून खाक झाली होती. त्‍यांनी घटनास्‍थळाचा पंचनामा केला. ठसे तज्‍ज्ञ व श्वान पथकाला पाचारण करण्यात आले. या प्रकरणात शाखा व्यवस्थापक सोमनाथ सोळंके यांच्या फिर्यादीवरून चोरट्यांविरुद्ध गुन्हा दाखल करण्यात आला आहे.