मोठी बातमी : शिवशाही बस-आयशरची भीषण धडक, 6 ठार, 21 जखमी; जालना – वडीगोद्री मार्गावरील दुर्घटना

जालना (सीएससीएन वृत्तसेवा ) : एसटी बस आणि आयशर वाहनाची टक्कर होऊन सहा जणांचा मृत्यू तर 21 जण जखमी झाले. ही दुर्घटना जालना – वडीगोद्री मार्गावरील शहापूरमठ तांड्याजवळ आज, 20 सप्टेंबरला सकाळी साडेआठच्या सुमारास घडली. अपघातामुळे वाहतूक बराच वेळ विस्कळीत झाली होती. जखमींना रुग्णालयात हलविल्यानंतर पोलिसांनी वाहतूक सुरळीत केली. 21 जखमींपैकी सहा गंभीर असून, मृतांत चारजण एसटीतील तर दोघे आयशरमधील आहेत. जखमींना आधी अंबड उपजिल्हा रुग्णालयात, नंतर जालना येथील जिल्हा रुग्णालयात हलविण्यात आले.

जिल्हाधिकारी डॉ. श्रीकृष्ण पांचाळ यांनी जखमींची भेट घेऊन चौकशी केली. शिवशाही बस गेवराई आगाराची असून गेवराईहून जालन्याला जात होती. त्याचवेळी जालन्याहून मोसंबी घेऊन आयशर वाहन येत होते. नागरिकांनी जखमींना वाहनातून बाहेर काढले. बस वाहक बंडू बारगजे हे एसटी कामगार संघटनेचे नेते होते. वडगाव ढाक येथे त्यांच्यावर दुपारी अंत्यसंस्कार करण्यात आले.

मृतकांची नावे
बसवाहक बंडू तुळशीराम बारगजे (वय 52,वडगाव ढोक, ता. गेवराई, जि.बीड) , प्रवासी राहिबाई रंगनाथ कळसाईत (वय 65, रा. मेहकर), पंचफुला भगवान सोळुंके (वय 65, रा. सुरडी) व अन्य एक प्रवासी, आयशरमधील सतीश देविदास नाईक (29, रा.मुंरादेवी, जि.अमरावती), आयशर चालक जब्बार शेख (52, मुरांदेवी, जि.अमरावती).

जखमींची नावे
बसचालक गोरखनाथ लक्ष्मण खेत्रे (रा. वाहेगाव, ता. गेवराई), विजयकुमार रमेश रावत (20, उत्तराखंड), कमल रमेश रावल (40, उत्तराखंड, कलावती चिमाजी कुर्‍हाडे (50, रा. सुखापुरी, ता.अंबड), गणेश कचरू सिंग (36, रा. येळम, ता. शिरूर), भारत बन्सी हिंजुडे (मारकर वाडी, ता. शिरूर), प्रभाकर भाऊराव गाडेकर (55, रेवकी देवकी, ता. गेवराई जि. बीड), कमल प्रभाकर गाडेकर ( रेवकी देवकी, ता. गेवराई), कार्तिकी सतीश कुर्‍हाडे (तीन, रा. सुखापुरी, ता.अंबड), भारत गणेश क्षीरसागर (36, रा. शिरूर), बापूराव राधाकृष्ण निकम (53, रा. साडेगाव ता. अंबड जि. जालना), शिफा मोसिन बागवान ( 10, शहागड, ता.अंबड), अफसाना सोहेल शेख ( 34), आरशिया मोबीन बागवान (35, रा.सेल), आफीका मोबीन बागवान (13 , सेलू), युसरा सोहेल शेख (35, सेलू), ओंकार मनोज घुंगासे ( 17, साष्ट पिंपळगाव, ता. अंबड), अंजली अनिल दुधाने ( 15, साष्ट पिंपळगावड), प्रवीण अनिल सुराशे (22, अंतरवाली सराटी).