विरोधी संचालकांच्या प्रश्नांची उत्तरे देताना सभापती पठाडेंच्या तोंडाला फेस!; व्यापाऱ्यांना तर बोलूच दिले नाही..!, बाजार समितीची वार्षिक सभा आरोप-प्रत्‍यारोपानी गाजली 

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : छत्रपती संभाजीनगर कृषी उत्पन्न बाजार समितीच्या सत्ताधाऱ्यांना संचालक, अडत्यांनी धारेवर धरले. सत्ताधाऱ्यांनी संचालक, अडत्यांच्या प्रश्नांवर उत्तरे देण्याऐवजी आपली री पुढे ओढली आणि अडत्‍यांची तर चक्क मुस्कटदाबी केल्याचा प्रकार वार्षिक सर्वसाधारण सभेत समोर आला.

जाधववाडीतील शेतकरी भवनात वार्षिक सभा झाली. नकाशा व आराखडे यावर सुमारे ६० लाख रुपये खर्च का आला, असा प्रश्न संचालक जगन्नाथ काळे यांनी केला. नव्याने रूजू झालेल्या कर्मचाऱ्यांची नावे अहवाल पुस्तकात कशी समाविष्ट झाली आणि मालमत्ता कर न भरल्यामुळे बाजार समितीच्या कार्यालयाला टाळे लावण्यापर्यंत नामुष्की आली, असे आरोप विरोधक संचालकांनी करत सत्ताधाऱ्यांना जेरीस आणले. बाजार समितीत मोकाट जनावरांमुळे शेतकऱ्यांचे नुकसान होते, हा मुद्दा दोन वर्षांपासून मांडतो; पण कारवाई होत नाही, असा आरोप नानासाहेब पळसकर यांनी केला. उत्तरे देताना सत्ताधाऱ्यांची बोबडी वळल्याचे दिसून आले. व्यापाऱ्यांना सभेत बोलू दिले नाही, असा आरोप अडत्यांनी केला. 

उत्पन्नाची सारवासारव...
विरोधी संचालकांच्या प्रश्नांवर उत्तरे देताना भांबावलेल्या सभापती राधाकिशन पठाडे यांनी उत्पन्नाचे आकडे पुढे करून स्वतःची पाठ थोपटून घेण्याचा प्रयत्‍न केला. बाजार समितीचे उत्पन्न ७ कोटी १६ लाखांवर गेले आहे. वर्षभरातच ७० लाखांनी उत्पन्न वाढले आहे, अशी माहिती त्यांनी दिली. या वेळी आदर्श शेतकरी, आदर्श अडत व्यापाऱ्यांचा सन्मान करण्यात आला. संचालक मुरलीधर चौधरी, सचिव विजय शिरसाठ, भागचंद ठोंबरे, गणेश दहीहंडे, राम शेळके, सुजाता गायके, जनाबाई ठोंबरे, भागीनाथ नवपुते, पूनमचंद बमणे आदी उपस्थित होते.