छत्रपती संभाजीनगर (मेट्रोपोलिस पोस्ट वृत्तसेवा) : महापालिका निवडणुकीत जागा वाटपावरून महायुतीच्या शिंदे गट आणि भाजपमध्ये ताणाताणी वाढण्याची शक्यता आहे. मंत्री अतुल सावे यांनी ‘फिफ्टी-फिफ्टी'चा फॉर्म्युला अवलंबला तरच युती होऊ शकते, असे स्पष्ट केल्यानंतर भाजपच्या स्थानिक पदाधिकाऱ्यांत नाराजीचा सूर उमटला. हा फार्म्युला कोणत्या आधारावर आणला जात आहे?, असा सवाल करत आ. संजय केणेकर यांनी भाजपलाच जास्त जागा मिळायला पाहिजेत, अशी भूमिका मांडली. ‘फिफ्टी-फिफ्टी'च्या फॉर्म्युल्यामुळे विरोधकांना आयते उमेदवार द्यायचे का, असे केणेकर म्हणाले. त्यामुळे शिंदे गटात चलबिचलता वाढली आहे.
पक्षाच्या वरिष्ठांनी महायुती करूनच निवडणूक लढवायची असल्याचे स्पष्ट केल्याने स्थानिक पातळीवर अतुल सावे यांनी भाजपला किमान ५० टक्के जागा मिळाव्यात, अशी भूमिका मांडली. त्यामुळे पक्षातील स्थानिक पदाधिकारी आणि इच्छुकांमध्ये नाराजीची भावना निर्माण झाली आहे. त्यांनी सावेंच्या या भूमिकेला विरोध सुरू केला आहे. सध्याची भाजपची अवस्था पाहता भाजपला शिंदे गटापेक्षा जास्त जागा मिळाव्यात, अशी अपेक्षा पदाधिकारी आणि इच्छुकांना आहे.
मात्र सावे आपल्या ‘फिफ्टी-फिफ्टी'च्या फॉर्म्युल्यावर शुक्रवारी (१९ डिसेंबर) ठाम राहिले, तर आ. केणेकर यांनी मात्र कडाडून विरोध केला. महायुतीमध्ये भाजप मोठा भाऊ राहील. या तत्त्वावरच युती झाली पाहिजे, असे ठामपणे सांगितले. महायुतीत भाजपला जास्त जागा मिळाल्या पाहिजेत. पक्षात अनेक इच्छुक व दमदार कार्यकर्ते आहेत, जे निवडणूक लढू शकतील. ‘फिफ्टी-फिफ्टी'च्या फॉर्म्युल्यात त्यांना संधी मिळणार नाही. हे उमेदवार इतर पक्षात जातील. कोअर कमिटीमध्ये समन्वयाने चर्चा करून निर्णय घेऊ, असे केणेकर यांनी म्हटले.
शिंदे गटाची काय आहे भूमिका?शिंदे गटाने महायुती करण्यासाठी २०१५ चा फॉर्म्यूला पुढे केला आहे. छत्रपती संभाजीनगर महापालिकेची शेवटची निवडणूक २०१५ मध्ये झाली होती, त्यावेळी शिवसेनेचे (अविभाजित) २९ नगरसेवक निवडून आले होते, तर ९ नगरसेवकांनी नंतर शिवसेनेत प्रवेश केला होता. त्यामुळे ३८ जागांवर शिंदे गटाने दावा केला आहे. आताच्या परिस्थितीत राज्यात आणि शहरात भाजप अधिक मजबूत आहे, तर शिवसेनेचे दोन गट झालेले आहेत. गेल्या निवडणुकीत भाजपचे २३ नगरसेवक होते, तेवढ्या जागा भाजपला आणि उरलेल्या जागांचे समान वाटप, अशी भूमिका शिंदे गटाने घेतली आहे. त्यात आता सावेंनी ‘फिफ्टी-फिफ्टी'च्या फॉर्म्युला ठेवला आहे. त्यामुळे शिंदे गटाला काहीअंशी दिलासा मिळाला असला तरी, भाजपमध्ये मात्र नाराजी पसरली आहे.
.jpg)
