अंबादास दानवे यांच्या जिवाला धोका?

छत्रपती संभाजीनगर (मेट्रोपोलिस पोस्ट वृत्तसेवा) : शिवसेना नेते तथा माजी विधान परिषद विरोधी पक्षनेते आ. अंबादास दानवे यांच्या जिवाला धोका असून, त्यांची सुरक्षा वाढविण्यात यावी, अशी मागणी ठाकरे गटाने पोलीस आयुक्‍त प्रवीण पवार यांच्याकडे गुरुवारी (११ डिसेंबर) निवेदनाद्वारे केली आहे. त्यांना विविध माध्यमांतून धमक्या मिळत असल्याचे म्हटले आहे.

निवेदनात नमूद केले की, दानवे यांनी सोशल मीडियावर एक व्हिडीओ पोस्ट केला होता. या व्हिडीओमध्ये नोटांचे बंडल मोजताना एक व्यक्ती दिसून येते. ही व्यक्ती कोण, व्हिडीओतील नोटांचा स्‍त्रोत काय, हे पैसे कोणाचे, याबाबत पोलीस यंत्रणेमार्फत तातडीने सखोल चौकशी करावी, अशी मागणीही निवेदनात केली आहे. रायगड जिल्ह्यात एका नेत्याच्या समर्थकांनी अंबादास दानवे यांच्या प्रतिकात्मक पुतळ्याला आग लावण्याची घटना घडली. या व्यक्तींची ओळख पटवून तातडीने कायदेशीर कारवाई करण्यात यावी.

दानवे यांना मिळत असलेल्या सर्व धमक्यांची यंत्रणात्मक पडताळणी करावी. त्यांची व्यक्तिगत सुरक्षा, निवासस्थानी सुरक्षा व दौऱ्यावेळी सुरक्षा तातडीने वाढवावी. धमक्या देणाऱ्यांची ओळख पटवून त्यांच्यावर त्वरित गुन्हे नोंदवावेत. अंबादास दानवे यांच्या जीविताला धोका झाल्यास त्यास महाराष्ट्र शासन व गृह विभाग पूर्णपणे जबाबदार राहील, असा गंभीर इशारा निवेदनाद्वारे देण्यात आला आहे. निवेदनावर महानगरप्रमुख राजू वैद्य, उपजिल्हाप्रमुख संतोष खेंडके, विजय वाघमारे, शहरप्रमुख हरिभाऊ हिवाळे, दिग्विजय शेरखाने, उपशहरप्रमुख राजेंद्र दानवे, प्रमोद ठेंगडे, रवी गायकवाड, दिनेशराजे भोसले, गिरीश चपळगावकर, नंदू लबडे, बाबासाहेब पैठणे, कान्हुलाल चक्रनारायण, महिला आघाडी महानगरसंघटक सुकन्या भोसले, शहर संघटक ॲड. सुनीता औताडे, माजी नगरसेविका मनीषा लोखंडे, युवासेना विभागीय सचिव धर्मराज दानवे व हरीश पाटील उपस्थित होते.