Copying of any text or photographs published on this website in whole or in part without the permission of 'Metropolis Post' newspaper is strictly prohibited. Please note that legal action will be taken if anyone is found doing so. - Editor, Metropolis Post
छत्रपती संभाजीनगर (मेट्रोपोलिस पोस्ट वृत्तसेवा) : छत्रपती संभाजीनगरचा महापौर होण्याची संधी सर्वसाधारण प्रवर्गातील उमेदवाराला मिळाली असून, भाजप मंत्री अतुल सावे हे कुणाच्या नावाला पसंती देतात, याकडे सर्वांचे लक्ष लागले आहे. महापालिका निवडणुकीत भाजपचे सर्वाधिक ५७ नगरसेवक निवडून आले असून, एकहाती सत्तेसाठी १ जागा कमी पडली तरी, महापौर भाजपचाच होणार आहे. त्यासाठी इतर पक्षांतील ५ नगरसेवकांनी भाजपला बिनशर्त पाठिंबाही दिला आहे. मात्र शिंदे गटाला सोबत घेऊन महापालिकेत सत्ता स्थापनेचा निर्णय भाजपने घेतला आहे. त्या बदल्यात शिंदे गटाला काय दिले जाते, याकडे लक्ष असणार आहे.
महापौरपदाच्या शर्यतीत अनिल मकरिये आणि समीर राजूरकर यांची नावे सध्या आघाडीवर आहेत. त्यानंतर विजय औताडे, राजगौरव वानखेडे, महेश माळवतकर, शिवाजी दांडगे, सुरेंद्र कुलकर्णी व रेणुकादास वैद्य ही नावेसुद्धा चर्चेत आहेत. निवडणूक प्रमुख म्हणून समीर राजूरकर यांनी भाजपचे काम पाहिले होते. भाजपचा महापौर कोण होणार हे सर्वस्वी मंत्री अतुल सावे यांच्यावर अलंबून असणार आणि तेच ठरवणार असल्याने ते कुणाच्या नावावर शिक्कामोर्तब करतात, हे पाहणे औत्स्युक्याचे ठरणार आहे.
