सिल्लोडमध्ये शिंदे गटाकडून मतदारांना पैसे वाटपाच्या संशयावरून राडा!, भाजप-शिंदे गटाचे कार्यकर्ते एकमेकांवर धावून गेले...(व्हिडीओसह)

सिल्लोड (मेट्रोपोलिस पोस्ट वृत्तसेवा) : सिल्लोड शहरातील प्रभाग क्रमांक ८ मधील शास्त्रीनगरात शनिवारी (२९ नोव्‍हेंबर) दुपारी १२ च्या सुमारास शिंदे गट व भाजपाच्या कार्यकर्त्यांमध्ये पैसे वाटपाच्या आरोपावरून राडा झाला. एका आशा स्वयंसेविकेने मतदारांना पैसे वाटप केल्याचा आरोप भाजपच्या उमेदवार रेखा भूमकर यांनी केला. भाजपने निवडणूक निर्णय अधिकारी नीलेश अपार यांच्याकडे तक्रार केली आहे. पोलिसांनी मात्र या तक्रारीत तथ्य नसल्याचे म्हटले आहे.

दोन आशा स्वयंसेविका काही पुरुषांसोबत मतदार यादी आणि पैसे घेऊन फिरत होत्या. ही बाब लक्षात येताच भाजप कार्यकर्त्यांनी त्यांना गाठले व प्रश्नांची सरबत्ती सुरू केली. ही बाब कळताच शिंदे गटाचे कार्यकर्ते धावून आले. त्यांनी आशा स्वयंसेविकांची बाजू घेतल्याने तणाव निर्माण झाला. दोन्ही पक्षांचे कार्यकर्ते एकमेकांवर धावून गेले. पोलिसांना राड्याची माहिती मिळताच तेही तत्‍काळ घटनास्‍थळी आले. त्यांनी हस्तक्षेप केला. भाजप उमेदवार रेखा भूमकर यांनी तक्रारीत म्हटले आहे की, दोन महिला घराघरात जाऊन मतदारांना पैसे वाटप करत होत्या. त्यांना मी हटकले असता पळून जाऊ लागल्या. त्यातील एक महिला पळून गेली, दुसरीला आम्ही पकडले.

तिच्या पर्समध्ये शिंदे गटाचे रुमाल व मतदारांची यादी मिळून आली, असेही भूमकर यांनी म्हटले आहे. दरम्यान, निवडणूक निर्वाचन अधिकारी अपार म्हणाले, की प्रभाग क्र. ८ मध्ये पैसे वाटप व दोन प्रभागांत बॅनर फाडल्याच्या तक्रारी आल्या असून, चौकशीचे आदेश पोलीस व आचार संहिता पथकाला दिले आहेत. पोलिसांना गस्त वाढविण्याची सूचना केली आहे. पोलीस निरीक्षक शेषराव उदार यांनी सांगितले, की शास्त्री कॉलनीत पैसे वाटप केल्याच्या आरोपावरून आम्ही आशा स्वयंसेविकेची चौकशी केली. ती शासकीय काम करत होती, असे तपासात आढळले आहे. त्यामुळे चौकशी करून तिला सोडून देण्यात आले. भाजप उमेदवाराने केलेल्या तक्रारीत तथ्य नाही, असे त्यांनी सांगितले.

दरम्यान, या निवडणुकीत आ. अब्दुल सत्तार यांनी आपला मुलगा अब्दुल समीर यांना शिंदे गटाकडून नगराध्यक्षपदाचे उमेदवार केले आहे, तर भाजपने मनोज मोरेल्लू यांना नगराध्यक्षपदासाठी उमेदवारी दिली आहे. या निवडणुकीत चमत्कार घडविण्याच्या तयारीत भाजप आहे. शुक्रवारी पोलिसांनी शहरातून पथसंचलन केले. यात उपविभागीय पोलीस अधिकारी डॉ. दिनेश कोल्हे, पोलीस निरीक्षक शेषराव उदार यांच्यासह अधिकारी, कर्मचारी सहभागी झाले. या निवडणुकीची धुरा भाजपने सुरेश बनकर यांच्या खांद्यावर सोपवली आहे.