छत्रपती संभाजीनगर (सीएससीएन वृत्तसेवा) : छत्रपती संभाजीनगर पश्चिम मतदारसंघाचे शिंदे गटाचे उमेदवार संजय शिरसाट यांनी शुक्रवारी (२५ ऑक्टोबर) उमेदवारी अर्ज दाखल करताना सादर केलेल्या शपथपत्रात आपल्या मालमत्तेसह वेगवेगळ्या स्वरुपाची माहिती सादर केली आहे.
गेल्या निवडणुकीत (२०१९) शिरसाट यांची मालमत्ता त्यांनी सव्वा तीन कोटी रुपयांची असल्याचे नमूद केले होते. गेल्या पाच वर्षांत ही मालमत्ता तब्बल दहापटीने वाढून ३३ कोटी झाली आहे. पाच वर्षांत वाढलेल्या संपत्तीमुळे सर्वांच्याच भुवया उंचावल्या आहेत. हा मुद्दा आयताच विरोधकांच्या हाती लागणार आहे.
-२०१९ च्या निवडणुकीत उमेदवारी अर्ज भरताना त्यांनी दोन्ही मुले व मुलगी यांच्या नावे असलेल्या संपत्तीचा उल्लेख केला होता. या वेळी त्यांनी पत्नी व स्वतःच्याच संपत्तीचा उल्लेख केला आहे.
-सध्या आ. शिरसाट यांच्याकडे एकही कार नाही. पत्नीच्या नावे एक १८ लाखांची कार आहे. त्यांच्यावर सात कोटींचे कर्ज असून पत्नीच्या नावेही दोन कोटींचे कर्ज आहे.
-१ कोटी ४२ लाखांचे दागिने, ४४ लाखांची रोकड तर बॉण्ड्स व शेअर्समध्ये एक कोटीं रुपयांच्या घरात गुंतवणूक असल्याचे त्यांनी नमूद केले आहे.
-मुंबईस्थित दोन फ्लॅटचे सध्याचे बाजारमूल्य ९ कोटींच्या आसपास असल्याचे त्यांनी शपथपत्रात म्हटले आहे.
-सध्या त्यांच्याविरुद्ध तीन फौजदारी पण राजकीय स्वरुपाचे गुन्हे दाखल आहेत. वाळूज, वेदांतनगर व वाळूज एमआयडीसी पोलीस ठाण्यात हे गुन्हे दाखल आहेत.
