Copying of any text or photographs published on this website in whole or in part without the permission of 'Metropolis Post' newspaper is strictly prohibited. Please note that legal action will be taken if anyone is found doing so. - Editor, Metropolis Post
कन्नड (मेट्रोपोलिस पोस्ट वृत्तसेवा) : अविवाहित राहून सामाजिक कार्य करणाऱ्या ६५ वर्षीय शकुंतला यादव देहाडे यांचा शनिवारी (३ डिसेंबर) दुपारी १२:३० च्या सुमारास कन्नड शहरातील शिवनगरमध्ये झोपेतच मृत्यू झाल्याचे समोर आले. घरातून दुर्गंधी येऊन लागल्याने हा प्रकार समोर आला.
शकुंतला देहाडे यांच्या कुटुंबात कोणीही नव्हते. त्या एकट्याच राहत होत्या. सामाजिक कार्यकर्त्या म्हणून वावरताना लोकांची शासकीय कामे करून द्यायच्या. चार दिवसांपूर्वी नेहमीप्रमाणे जेवण करून झोपी गेल्या होत्या. शनिवारी सकाळी १० ला त्यांच्या घरातून दुर्गंधी येऊ लागल्याने नागरिकांनी शहर पोलिसांना कळवले. सहायक पोलीस निरीक्षक कुणाल सूर्यवंशी यांनी सहकाऱ्यांसह घटनास्थळी धाव घेतली. घराचा दरवाजा आतून बंद होता.
शकुंतलाबाईंच्या काही नातेवाइकांना बोलावून दरवाजा तोडण्यात आला. त्यावेळी लाकडी दिवाणावर शकुंतला मृतावस्थेत दिसून आल्या. मृतदेह फुगलेला होता व कुजण्यास सुरुवात झाला होता. त्यांचा मृतदेह उत्तरीय तपासणीसाठी कन्नड ग्रामीण रुग्णालयात पाठविण्यात आला. झोपेतच शकुंतला देहाडे यांचा मृत्यू झाला असावा, असा प्राथमिक अंदाज वैद्यकीय अधिकारी डॉ. राम पुंगळे यांनी व्यक्त केला आहे. याप्रकरणी कन्नड शहर पोलिसांनी आकस्मिक मृत्यूची नोंद केली आहे.
