वैजापूर (मेट्रोपोलिस पोलीस पोस्ट वृत्तसेवा) : जेवणावरून हॉटेलमालकसोबत वाद झाल्यानंतर घरी निघालेल्या ४२ वर्षीय व्यक्तीची कार रस्त्यात हॉटेलमालकाने साथीदारांसह अडवून सिनेस्टाइल हल्ला चढवला. हॉकीस्टिक, लोखंडी रॉडने अमानुष मारहाण केली. विरगाव पोलिसांनी हॉटेलमालकासह त्याच्या १५ साथीदारांविरुद्ध गुन्हा दाखल केला आहे. ही घटना शनिवारी (२७ डिसेंबर) रात्री १० च्या सुमारास घडली.
सुशिल साहेबराव शिंगाडे (वय ४२, रा. माळीघोगरगाव ता. वैजापूर) यांनी याप्रकरणात तक्रार दिली आहे. ते सध्या पुण्यात पत्नी, दोन मुलींसह राहतात. ते मूळचे माळीघोगरगावचे आहेत. त्यांची आजी ताराबाई गावात राहतात. शनिवारी (२७ डिसेंबर) सुशील, त्यांचे मित्र वैभव राजू साळवे, सुरज शिनगारे हे कारने रात्री साडेनऊला हमरापूरच्या गंगथडी हॉटेलमध्ये आले. तेथे सुरज शिनगारे व वैभव साळवे यांचा हॉटेलमालक विजय भोसले व तेथे हजर असलेले प्रविण भोसले यांच्यासोबत जेवणाच्या कारणावरून वाद झाला. विजय भोसले व प्रविण भोसले यांनी त्यांना शिवीगाळ करून चापट बुक्याने मारहाण केली.
सुशील यांनी मध्यस्थी केल्याने वाद मिटला. मात्र विजय भोसले व प्रविण भोसले यांनी सागर उगले, गणेश उगले, सुनिल उगले यांना बोलावून घेतले. तोपर्यंत सुरज शिनगारे आणि त्यांचे मित्र कारने तिथून निघून गेले होते. मित्रांना घरी सोडून सुशील हे माळीघोगरगाव येथे जाण्यास निघाले. रात्री १० च्या सुमारास नागमठाण येथील यादगार हॉटेलसमोर सुशील यांच्या कारसमोर १५ ते २० माणसे काही मोटारसायकलींवर आले. त्यांनी कारसमोर गाड्या आडव्या लावल्या. त्यात सागर उगले, गणेश उगले, सुनिल उगले, विजय भोसले, प्रविण भोसले व अनोळखी अंदाजे १२ ते १४ जण होते.
त्यांनी कारला हॉकीस्टीक, लोखंडी रॉड व दगडाने मारून तोडफोड सुरू केली. सुशील यांची कॉलर पकडून कारखाली ओढले. तेव्हा गळ्यातील सोन्याची चैन तुटून नुकसान झाले. लोखंडी रॉड, हॉकीस्टीकने सुशील यांच्या दोन्ही पायावर मारू लागले. सुनिल ओगले याने फायटरने तोंडावर व ओठावर मारत असताना सुशील जोरात ओरडू लागले तेव्हा सर्वांनी घेरले आणि लाथाबुक्क्यांनी मारहाण सुरू केली. त्यानंतर ते निघून गेले. सुशील यांनी विरगाव पोलीस ठाणे गाठून तक्रार दिली. त्यावरून पोलिसांनी सागर उगले, गणेश उगले, सुनील उगले, विजय भोसले, प्रवीण भोसले व इतर १२ ते १४ जणांविरुद्ध गुन्हा दाखल केला आहे. अधिक तपास पोलीस अंमलदार परमेश्वर चंदेल करत आहेत.
