सिल्लोड (मेट्रोपोलिस पोस्ट वृत्तपत्राच्या सौजन्याने) : सिल्लोड तालुक्यातील भवन येथील पूर्णा नदीवरील पूल नऊ वर्षांपासून अर्धवट असल्याचा फटका बुधवारी (२९ ऑक्टोबर) छत्रपती संभाजीनगर-जळगाव महामार्गावरून जाणाऱ्या शेकडो वाहनधारकांना बसला. या पुलावरील खड्ड्यात ट्रक अडकला. त्यामुळे सुमारे साडेचार तास वाहतूक कोंडी झाली होती. वाहनधारकांबरोबरच पोलिसांनाही त्रास सहन करावा लागला.
पुलाच्या बांधकामाकडे राष्ट्रीय महामार्ग प्राधिकरणाचे अक्षम्य दुर्लक्ष सुरू आहे. त्यामुळे नेहमीच वाहतूक कोंडी होते. बुधवारी सकाळी दहाच्या सुमारास मालवाहतूक करणारा एक ट्रक या पुलावरील खड्ड्यात अडकून नादुरुस्त झाला. ट्रक पुलावरच अडकल्याने दोन्ही बाजूंची वाहतूक खोळंबली. अवघ्या काही मिनिटांतच महामार्गावर भवनच्या दिशेने सिल्लोडपर्यंत ४ किलोमीटर तर दुसऱ्या बाजूला केऱ्हाळा फाट्यापर्यंत चार किलोमीटरपर्यंत वाहनांच्या रांगा लागल्या होत्या.
सुमारे साडेचार तास ही वाहतूक कोंडी कायम होती. यामुळे कार, बस, ट्रक, दुचाकी यांच्यासह शेकडो नागरिक या कोंडीत अडकले होते. महत्त्वाचे म्हणजे या कोंडीत सिल्लोडहून छत्रपती संभाजीनगरकडे निघालेली एक शासकीय रुग्णवाहिकादेखील तब्बल पाऊण तास अडकून पडली होती. वेळेत उपचार न मिळू शकल्याने या रुग्णवाहिकेतील रुग्णाची तब्येत चिंताजनक बनली होती. या रुग्णाची घालमेल पाहून तिथे उपस्थित असलेल्या लोकांमध्ये संतापाची लाट उसळली होती.
पोलिसांनी बुजवला खड्डामहामार्गावर वाहतूक कोंडी वाढतच चालल्याने अखेर सिल्लोड ग्रामीण पोलीस ठाण्याचे सहायक पोलीस निरीक्षक रवींद्र ठाकरे यांनी सहकाऱ्यांसह घटनास्थळी धाव घेतली. महामार्गाच्या देखभालीची जबाबदारी असलेली यंत्रणा येत नसल्याचे पाहून अखेर ठाकरे यांच्यासह पोलीस उपनिरीक्षक लहू घोडे व इतर पोलीस कर्मचाऱ्यांनी माती- दगड टाकून तो खड्डा तात्पुरता बुजवला. या सर्वांच्या प्रयत्नामुळे अखेर या महामार्गावरील वाहतूक पूर्ववत होऊ शकली.
.jpeg)
