गंगापूर (मेट्रोपोलिस पोस्ट वृत्तपत्राच्या सौजन्याने) : कायगाव (ता. गंगापूर) येथील मुंडलिक ज्वेलर्समध्ये मंगळवारी (२३ सप्टेंबर) सायंकाळी साडेपाचच्या सुमारास दरोडेखोरांनी थरार घडवला. सराफावर गोळीबार करून लुटण्याचा प्रयत्न केला. मात्र सराफाने प्रतिकार केल्याने त्यांचे प्रयत्न अपयशी झाले. दोन गोळ्या झाडूनही सतीश मुंडलिक (रा. छत्रपती संभाजीनगर) यांना त्या लागल्या नाहीत. दरोडखोरांच्या या कृत्यामुळे तालुक्यात खळबळ उडाली आहे.
कायगाव येथे मुंडलिक ज्वेलर्स असून, त्याचे मालक सतीश मुंडलिक आहेत. ते छत्रपती संभाजीनगरला राहतात. दुकान बंद करून छत्रपती संभाजीनगरला जायचे असल्याने आवराआवर करून दुकानातील दागिने एका बॅगमध्ये त्यांनी भरले. त्याच वेळी अचानक तिघे जण पल्सर दुचाकीवरून आले. त्यातील दोघांनी दागिन्यांची बॅग हिसकावण्याचा प्रयत्न केला. मुंडलिक यांनी त्यांना जोरदार प्रतिकार केला. तिघांपैकी एकाला सतीश यांनी जोरात दाबून धरले. त्यामुळे दरोडेखोर चिडले. त्यांनी सतीश यांच्यावर दोन गोळ्या झाडल्या.
सतीश यांनी एकाला पकडलेले असल्याने साथीदाराला गोळी लागण्याच्या भीतीने त्यांनी सतीश यांच्यापासून बाजूला गोळ्या झाडल्या. त्यामुळे सतीश बालंबाल बचावले. त्याचवेळी सतीश हे जोरजोरात ओरडत असल्याने आणि गोळीबाराच्या आवाजाने नागरिक धावून आले. त्यामुळे दरोडेखोरांनी बॅग तिथेच सोडून पळ काढला. माहिती मिळताच उपविभागीय पोलिस अधिकारी डॉ. नीलेश पालवे, पोलीस निरीक्षक कुमारसिंग राठोड, पोलीस उपनिरीक्षक औदुंबर लाटे, संतोष झोरे यांनी घटनास्थळी भेट दिली. घटना सीसीटीव्ही कॅमेऱ्यात कैद झाली आहे. त्याआधारे दरोडेखोरांचा कसून शोध घेतला जात आहे. गंगापूर पोलिसांनी दरोडेखोरांविरुद्ध गुन्हा दाखल केला आहे.
.jpg)
