गंगापूरचे माजी आमदार अण्णासाहेब माने, पुत्र संतोषसह शिंदे गटात दाखल, आ. बंब यांच्यासाठी धोक्याची घंटा

गंगापूर (मेट्रोपोलिस पोस्ट वृत्तपत्राच्या सौजन्याने) : गंगापूरचे माजी आमदार अण्णासाहेब माने यांनी पुत्र संतोष माने यांच्यासह मुंबई येथील दसरा मेळाव्यात शिवसेनेच्या शिंदे गटात प्रवेश केला आहे. गेल्या काही दिवसांपासून पिता-पुत्र राजकारणापासून अलिप्त होते. आता शिंदे गटात येऊन त्यांनी पुन्हा राजकीय मैदानात उडी घेतली आहे. यापूर्वी गंगापूरचे माजी आमदार कैलास पाटील शिंदे गटात दाखल झाले आहेत. आता माने पिता-पुत्र आले आहेत. त्यामुळे शिंदे गटाचे भविष्यातील राजकीय आडाखे काय असतील, याबद्दल चर्चा घडून येत आहेत. भाजपचे आ. प्रशांत बंब यांच्यासाठी ही धोक्याची घंटा वाजू लागली आहे.

१९९९ मध्ये पहिल्यांदाच आमदार झालेले अण्णासाहेब माने सलग दोनदा शिवसेनेचे आमदार राहिले. २००९ मध्ये अपक्ष उमेदवार प्रशांत बंब यांनी त्यांचा पराभव केला. त्यांचे पुत्र संतोष माने २०१२ मध्ये शिवसेनेचे जिल्हा परिषद सदस्य म्हणून निवडून आले. २०१४ च्या विधानसभा निवडणुकीत पक्षाने ऐनवेळी अंबादास दानवे यांना विधानसभेची उमेदवारी दिली होती. त्यामुळे नाराज माने यांनी २ ऑक्टोबर २०१९ रोजी त्यांनी मुलाच्या उमेदवारीसाठी राष्ट्रवादी काँग्रेसमध्ये प्रवेश केला होता.

त्यावेळी संतोष माने यांनी दुसऱ्या क्रमांकाची मते घेतली होती. २०२४ च्या विधानसभा निवडणुकीसाठी सतीश चव्हाण यांनी गंगापूर मतदारसंघातून लढण्याची तयारी केल्याने माने पिता-पुत्र २४ एप्रिल २०२३ रोजी तेलंगणा राज्यातील बीआरएस पक्षात दाखल झाले. मात्र या पक्षाचा त्यांच्याच राज्यात दारुण पराभव झाल्यानंतर त्यांनी महाराष्ट्रातून गाशा गुंडाळला. त्यामुळे राजकीय संकटात सापडलेल्या माने पिता-पुत्राला आता शिंदे गटात नवसंजीवनी दिली आहे.

भविष्यातील आडाखे काय?
गंगापूरमध्ये शिंदे गटाचे अस्तित्व नावालाच आहे. अशा स्थितीत दोन माजी आमदार शिंदे गटात दाखल झाल्याने पक्ष वाढीसाठी त्‍यांच्याकडून प्रामाणिक प्रयत्न होणे गरजेचे आहे. मूळ शिवसैनिकांना सोबत घेत शिंदे गटाचे वर्चस्व मतदासंघात निर्माण करणे कैलास आणि माने पिता-पुत्रासाठी आव्हान असणार आहे. त्यांनी हे आव्हान पेलण्यात उत्साह दाखवला तर आ. बंब यांच्यासाठी मात्र धोक्याची घंटा वाजणार आहे.