गंगापूरच्या तांदूळवाडीत सशस्त्र दरोडा, दरोडेखोरांनी क्रूरतेच्या सीमा केल्या पार, दिसेल त्याच्यावर कुऱ्हाडीचे घाव, सव्वा दोन लाखांची लूट, ४ जखमी

गंगापूर (गणेश म्हैसमाळे : मेट्रोपोलिस पोस्ट वृत्तसेवा) : गंगापूर तालुक्यातील तांदूळवाडी शिवारातील शेतकऱ्याच्या घरावर सशस्त्र दरोडा घालून २ लाख ३१ हजार रुपयांचा ऐवज दरोडेखोरांनी लुटून नेला. ही घटना आज, १७ नोव्हेंबरच्या पहाटे दोनच्या सुमारास घडली.

पोपट जनार्धन राशनकर (वय ३५, रा. तांदूळवाडी) यांच्या तक्रारीवरून शिल्लेगाव पोलिसांनी ३ ते ४ दरोडेखोरांविरुद्ध गुन्हा दाखल करून तपास सुरू केला आहे. दरोडेखोरांनी लुटलेल्या ऐवजात पोपट यांची पत्नी मनिषा यांच्या गळ्यातील दोन ग्रॅमचे मनी मंगळसूत्र, कपाटातील एक तोळ्याचा सोन्याचा नेकलेस, कानातील २ झुंबर, एक तोळ्याची सोन्याची पोत, ६ ग्रॅमचे मनी मंगळसूत्र, २ ग्रॅमची सोन्याची नथ (किंमत २ लाख १२ हजार), ५ हजार रुपये रोख असा एकूण २ लाख ३१ हजार रुपयांचा ऐवज  दरोडेखोरांनी लुटला. दरोडेखोरांनी दहशत निर्माण करण्यासाठी कुऱ्हाड आणि लाकडी काठ्यांनी राशनकुमार कुटुंबीयांना बेदम मारहाण केली.

यात पोपट राशनकर, त्यांची पत्नी मनिषा, आई जनाबाई, वडील हिरामण हे गंभीर जखमी झाले आहेत. रात्री उशिरापर्यंत दरोडेखोरांना अटक करण्यात पोलिसांना यश आले नाही. अधिक तपास पोलीस निरीक्षक चाऊस करत आहेत. घटनास्‍थळी उपविभागीय अधिकारी पालवे, स्थानिक गुन्हे शाखेचे पोलीस निरीक्षक राजपूत, सहायक पोलीस निरीक्षक इंगळे यांनी भेट देऊन पाहणी केली. श्वान पथक व ठसेतज्‍ज्ञांनाही घटनास्थळी पाचारण केले होते. तीन -चार दरोडेखोर पहाटे दोनला अचानक दार तोडून घरात घुसले. त्यांनी राशनकर कुटुंबीयांना लाकडी दांड्यासह कुऱ्हाडीने डोक्यात, हाता-पायांवर मारहाण करून जखमी केले.