छत्रपती संभाजीनगर जिल्ह्यात एकाच वेळी १९२० शाळांत झाली पालक सभा, जिल्हाधिकारी म्हणाले...

छत्रपती संभाजीनगर (मेट्रोपोलिस पोस्ट वृत्तसेवा) : संस्कारक्षम व गुणवत्ताधारक विद्यार्थी घडविण्यासाठी जिल्ह्यात सुरू असलेल्या दशसूत्री उपक्रमांतर्गत आज, २५ नोव्‍हेंबरला एकाच वेळी १९२० शाळांत पालक सभांचे आयोजन करण्यात आले. आजचे विद्यार्थी हे उद्याचे नागरिक आहेत. चांगले नागरिक घडविण्यासाठी त्यांचा सर्वांगिण विकास होणे आवश्यक आहे. त्यासाठी शिक्षणासोबत त्यांच्यावर संस्कार रुजविणे आवश्यक असल्याचे प्रतिपादन जिल्हाधिकारी दिलीप स्वामी यांनी केले.

गाडीवाट केंद्र कचनेर (ता. छत्रपती संभाजीनगर) येथील जिल्हा परिषद शाळेत आयोजित पालक सभेला जिल्हाधिकारी दिलीप स्वामी स्वतः उपस्थित होते. जिल्ह्यात दशसूत्री या उपक्रमांतर्गत संस्कारक्षम, आरोग्यक्षम, कौशल्य क्षम, स्पर्धा क्षम विद्यार्थी घडविण्यासाठी शाळांमध्ये विविध उपक्रम राबविण्यात येत आहेत. त्याद्वारे विद्यार्थ्यांचा सर्वांगिण विकास होणे अपेक्षित असून त्याद्वारे शैक्षणिक गुणवत्तेसोबतच अन्य संस्कार जसे संतसाहित्य वाचन, पौष्टिक आहाराबाबत जागृती, क्रीडा कौशल्य, ज्येष्ठांचा आदर यासारख्या अनेक बाबी शिकविल्या जात आहेत. या उपक्रमात पालकांचा सहभाग आवश्यक असून त्यासाठी या उपक्रमाबाबत पालकांना आजच्या पालकसभांद्वारे अवगत करून त्यांना सहभाग देण्याबाबत आवाहन करण्यात आले.

गाडीवाट येथील प्राथमिक शाळेतील पालक सभेत जिल्हाधिकारी स्वामी यांच्या समवेत सरपंच ज्ञानेश्वर भालके, तहसीलदार शिवानंद बिडवे, गट शिक्षणाधिकारी चेतन कांबळे, शिक्षण विस्तार अधिकारी श्रीराम केदार, मंडळ अधिकारी आश्विनी सोनवणे, शाळा व्यवस्थापन समितीचे अध्यक्ष आसिफ शेख, कोळगे गुरुजी, मुख्याध्यापक प्रभाकर गायकवाड आदी उपस्थित होते. जिल्हाधिकारी स्वामी म्हणाले, की संत साहित्यात जीवनाविषयी प्रेरणादायी मार्गदर्शन आहे. ते संस्कार विद्यार्थ्यांमध्ये रुजवायला हवे. आयुष्यात येणारे लहानमोठे अपयशाचा ते सामना करू शकले पाहिजे, असे ते म्हणाले. कार्यक्रमाला गावातील पालक मोठ्या संख्येने उपस्थित होते. विस्तार अधिकारी श्रीराम केदार यांनी आभार मानले.