Copying of any text or photographs published on this website in whole or in part without the permission of 'Metropolis Post' newspaper is strictly prohibited. Please note that legal action will be taken if anyone is found doing so. - Editor, Metropolis Post
छत्रपती संभाजीनगर (मेट्रोपोलिस पोस्ट वृत्तसेवा) : वाळूज एमआयडीसीत असल्याने प्रचंड उत्पन्न असूनही वडगाव कोल्हाटी ग्रामपंचायत नागरिकांना मुलभूत सोयीसुविधा पुरवण्यात अपयशी ठरली असून, याला कारणीभूत अधिकारी आणि पदाधिकाऱ्यांचा संगणमताने सुरू असलेला गैरकारभार असल्याची चर्चा सुरू झाली आहे. प्रदीर्घ काळापासून वीज, पाणी आणि ड्रेनेज समस्येला घेऊन गट क्रमांक ९ मधील महिला ग्रामपंचायतीचे उंबरठे झिजवत आहेत. दरवेळी आश्वासने देऊन वेळ मारून नेणाऱ्या पदाधिकाऱ्यांच्या अकार्यक्षमतेमुळे आणि गैरव्यवहाराने बरबटलेल्या वृत्तीमुळे अखेर या महिलांना उपोषणाचे अस्त्र उपसावे लागले. आज, ११ डिसेंबरपासून या महिला उपोषणाला बसल्या आहेत. पहिल्याच दिवशी ३० ते ३५ महिलांनी सहभाग घेत, लेखी आश्वासन मिळाल्याशिवाय आता उपोषण मागे घेणार नाही, असा पवित्रा घेतला आहे. महिलांच्या आंदोलनामुळे पितळ उघडे पडल्याने पदाधिकाऱ्यांचे धाबे दणाणले आहेत.
पाणी कर, वीज कर तसेच आरोग्यविषयक कर नियमितपणे ग्रामपंचायत वसूल करते, मात्र सोयीसुविधा पुरवत नाही. आम्हाला रोज विकतचे पाणी घेऊन भुर्दंड सहन करावा लागत आहे. रस्ते नाहीत. विद्युत खांब उभारले, पण त्यावर दिवे लावले नाहीत. ड्रेनेज व्यवस्था नसल्याने सांडपाणी रस्त्यावर साचून दुर्गंधी पसरून आरोग्य धोक्यात आले आहे, असे गंभीर आरोप महिलांनी केले आहेत. वारंवार पाठपुरावा करूनही ग्रामपंचायतीने दुर्लक्ष केल्याने महिलांनी गट क्र. ९ मध्येच उपोषण सुरू केले. कर भरतोय जनता पण सेवा कुठे? असा सवाल त्यांनी करत जोरदार घोषणाबाजी केली. रोज नवीन ३० महिलांचा गट उपोषणाला पाठिंबा देणार असल्याचे सांगण्यात आले. केवळ गट क्रमांक ९ च नव्हे तर संपूर्ण वडगाव गट नंबर परिसरातून आंदोलनाला पाठिंबा मिळताना दिसत आहे.
