गुंठेवारीचे शुल्क कमी होणार तरी कधी?; दीड महिन्यापासून छत्रपती संभाजीनगर महानगर विकास प्राधिकरण घेईना निर्णय!

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : छत्रपती संभाजीनगर, गंगापूर, खुलताबाद, फुलंब्री आणि पैठण या पाच तालुक्यांतील ३१३ गावांतील नागरिकांचे लक्ष सध्या गुंठेवारी नियमितीकरणाच्या शुल्क कपातीकडे लागून राहिले आहे. मात्र छत्रपती संभाजीनगर महानगर विकास प्राधिकरण (सीएसएमआरडीए) दीड महिन्यापासून याबाबतचा निर्णय घेत नसल्याने आता हा निर्णय होणार तरी कधी, असा प्रश्न या नागरिकांना पडला आहे.

‘सीएसएमआरडीए’ अंतर्गत पाच तालुक्यांतील ३१३ गावे येतात. याशिवाय शासनाने सिडको झालर क्षेत्रासाठीही ‘सीएसएमआरडीए’ची विशेष नियोजन प्राधिकरण म्हणून नियुक्ती केली आहे. या निर्णयामुळे हिरापूर, झाल्टा, गांधेली, बाळापूरसह आणखी २६ गावांच्या महसुली क्षेत्राचा ‘सीएसएमआरडीए’मध्ये समावेश झाला आहे. त्यामुळे प्राधिकरणाचे कार्यक्षेत्र आणखीच विस्तारले आहे. तीन महिन्यांपूर्वी ‘सीएसएमआरडीए’ने गुंठेवारी नियमितीकरणाची प्रक्रिया सुरू केली होती. प्राधिकरण हद्दीत बांधकाम करताना अकृषक परवाना तसेच रेखांकनाची मंजुरी घ्यावी लागते. असे असताना गेल्या काही वर्षांत प्राधिकरणाच्या हद्दीत अनेक अनधिकृत बांधकामे झाली आहेत.

शासनाने प्राधिकरण क्षेत्रात गुंठेवारी कायद्याच्या अंमलास मंजुरी दिल्याने अनेक अनधिकृत बांधकामे गुंठेवारी नियमांतर्गत नियमित होऊ शकणार आहेत. परंतु नियमितीकरणाचे शुल्क फारच जास्त असल्याने लोकांनी बांधकामे अधिकृत करून घेण्याकडे पाठ फिरवली आहे. त्यामुळे नियमितीकरणाचा निर्णय होऊनही त्याची फारशी अंमलबजावणी होऊ शकलेली नाही. विशेष म्हणजे हे चित्र पाहून प्राधिकरणाने नियमितीकरणाचे शुल्क कमी करण्याचा निर्णय घेतला होता.  मात्र दीड महिना उलटून गेल्यानंतरही या शुल्क कपातीच्या प्रस्तावावर अद्यापही प्राधिकरणाकडून निर्णय झालेला नाही. हे शुल्क कमी झाल्यानंतरच बांधकामे अधिकृत करून घेऊ या विचारात प्राधिकरणांतर्गत येणाऱ्या गावातील बेकायदा बांधकामे करणारे असून, आता शुल्क कपातीचा निर्णय कधी होतो याकडे त्यांचे लक्ष लागून राहिले आहे.