हर्सूलमध्ये पाडापाडीला ब्रेक, मनपासोबत चर्चेशिवाय कारवाई होणार नाही, पोलिसांच्या आश्वासनानंतर मालमत्ताधारकांचे उपोषण मागे

By City News Desk

On 22 Nov 2025

हर्सूलमध्ये पाडापाडीला ब्रेक, मनपासोबत चर्चेशिवाय कारवाई होणार नाही, पोलिसांच्या आश्वासनानंतर मालमत्ताधारकांचे उपोषण मागे

Copying of any text or photographs published on this website in whole or in part without the permission of 'Metropolis Post' newspaper is strictly prohibited. Please note that legal action will be taken if anyone is found doing so. - Editor, Metropolis Post

छत्रपती संभाजीनगर (मेट्रोपोलिस पोस्ट वृत्तसेवा) : महापालिकेच्या हर्सूलमधील रस्ता रूंदीकरणाच्या मोहिमेला पुन्हा एकदा ब्रेक लागला आहे. पोलिसांनी बंदोबस्त पुरवण्यास नकार दिल्याने शुक्रवारी (२१ नोव्‍हेंबर) हर्सूलमध्ये पाडापाडी झाली नाही. मालमत्ताधारकांनी बुधवारपासून (१० नोव्हेंबर) सुरू केलेल्या बेमुदत उपोषणाची सांगता शुक्रवारी रात्री साडेअकराच्या सुमारास सामाजिक कार्यकर्ते विनोद पाटील यांच्या हस्ते करण्यात आली. तत्‍पूर्वी पोलीस अधिकाऱ्यांनी उपोषणकर्त्यांची भेट घेऊन महापालिका प्रशासनासोबत बैठक घडवून आणण्याचे आश्वासन दिले..

हर्सूल टी पॉइंट ते महापालिका हद्दीपर्यंत रस्ता रूंद करायचा असल्याने महापालिकेने १८ नोव्‍हेंबरला भोंगा फिरवून मालमत्ता स्वतःहून काढून घेण्याचे आवाहन केले होते. पैठण गेटवरील अतिक्रमणे काढण्यात जशी आक्रमक भूमिका महापालिका प्रशासनाने घेतली, तशीच हर्सूलमध्येही घेण्यात येईल, अशी भीती निर्माण झाली. पाच मालमत्ताधारक महापालिकेच्या कारवाईला विरोध म्हणून उपोषणाला बसले होते. त्यांनी आधी मोबादला द्या, नंतरच पाडापाडी करा, अशी ठाम भूमिका घेतली.

धार्मिक स्थळांनाही पर्यायी जागा मागितली. पाडापाडीसाठी महापालिका प्रशासनासने शुक्रवार निवडला होता, मात्र पोलिसांनी बंदोबस्त पुरवण्यास नकार दिला. त्यामुळे मोहीम बारगळली आहे. पोलीस निरीक्षक अविनाश आघाव, स्वाती केदार यांनी उपोषणकर्त्यासोबत चर्चा करून महापालिका प्रशासनासोबत बैठक घडवून आणण्याचे आश्वासन दिले. मनपासोबत चर्चा झाल्याशिवाय कारवाई होणार नाही, असेही सांगितले. त्यानंतर विनोद पाटील यांच्या हस्तेपाणी उपोषण सोडण्यात आले.