छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : घराजवळच खेळणारी साडेपाच वर्षांची चिमुरडी अचानक बेपत्ता झाल्याने पळशी (ता. छत्रपती संभाजीनगर) शिवारातील ओंकार सिटी या बांधकाम साइटवर मंगळवारी (११ नोव्हेंबर) दुपारी तीनला खळबळ उडाली. बुधवारी (१२ नोव्हेंबर) रात्रीपर्यंत पोलीस तिचा कसोशीने शोध घेत होते. मात्र ती मिळून आली नव्हती. तिच्या अपहरणाचा संशय निर्माण झाला आहे.
राशी शिनू चव्हाण (वय साडेपाच वर्षे, मूळ रा. सेंधवा, मध्यप्रदेश, उंची साडेतीन फूट, हिंदी भाषिक) असे अपहरण झालेल्या मुलीचे नाव आहे. पळशीजवळील ओंकार सिटी बांधकाम साइटवर सेंधवा येथून चव्हाण दाम्पत्य कामानिमित्त आले आहेत. दाम्पत्य कामात असताना त्यांची मुलगी इतर कामगारांच्या मुलींसोबत खेळत होती. दुपारी काम थांबवून चव्हाण हे इमारतीखाली आले, तेव्हा इतर मुलींसोबत राशी दिसली नाही. त्यांनी इतर मुलींना विचारणा केली, मात्र त्यांना काही सांगता आले नाही. त्यामुळे घाबरलेल्या चव्हाण दाम्पत्याने अन्य कामगारांच्या मदतीने राशीचा शोध सुरू केला. मात्र राशी मिळून न आल्याने अखेर चिकलठाणा पोलिसांना कळविण्यात आले.
उपविभागीय पोलीस अधिकारी पूजा नागरे, पोलीस निरीक्षक रविकिरण दरवडे यांनी घटनास्थळी धाव घेतली. अग्निशमन दलाच्या मदतीने परिसरातील पानवठे, शेततळ्यांतही शोध घेतला. पिसादेवी, पळशी परिसर पिंजून काढला. मात्र राशीचा शोध लागला नाही. श्वान पथकही माग काढू शकले नाही. पोलीस अधीक्षक डॉ. विनयकुमार राठोड यांनी याप्रकरणात स्वतः लक्ष घातले असून, स्थानिक गुन्हे शाखेला तपासाच्या सूचना केल्या आहेत. चार पथके राशीच्या शोधासाठी तैनात करण्यात आली आहेत. इतर जिल्हा पोलिसांनाही राशीचा फोटो पाठवून कळविण्यात आले आहे. गुरुवारी अधिक कर्मचाऱ्यांसह तिचा शोध घेऊ. कुणाला राशी दिसल्यास चिकलठाणा पोलिसांशी संपर्क करावा, असे आवाहन पोलीस निरीक्षक रविकिरण दरवडे यांनी केले आहे.
.jpg)
