प्रवाशांसोबत गैरवर्तन, नियमांचे उल्लंघन, शहर पोलिसांचा ५९५ रिक्षाचालकांना दणका!

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : प्रवाशांसोबत गैरवर्तन, वाहतूक नियमांचे उल्लंघन करणाऱ्या ५९५ रिक्षाचालकांना शहर पोलिसांनी आज, ७ ऑक्‍टोबरला विशेष मोहीम राबवून दणका दिला. त्यांना ६ लाख १ हजार १५० रुपयांचा दंड ठोठावला आणि ४७ हजार ५०० रुपये वसूलही केले. कारवाईत ८ रिक्षा जप्त करण्यात आलेल्या आहेत.

अनेक रिक्षाचालक विना गणवेश, विना कागदपत्रे, विना लायसन्स तसेच दारू पिऊन सर्रास रिक्षा चालवतात. काही रिक्षाचालक हे प्रवाशांसोबत गैरवर्तन करतात. गुन्हेगारी स्वरुपाचे वर्तन करून वाहतूक नियमांचे उल्लंघन करत असल्याच्या तक्रारी वाढल्या आहेत. त्यामुळे पोलीस आयुक्तांनी वाहतूक विभागाला विशेष मोहीम राबवून कारवाईचे आदेश दिले आहेत. आज सकाळी ११ ते दुपारी २ पर्यंत वाहतूक विभागाच्या पाचही शाखांचे अधिकारी, अंमलदार नियम धाब्यावर बसवणाऱ्या रिक्षांवर कारवाईसाठी रस्त्यावर उतरले.

ही कारवाई पोलीस आयुक्‍त प्रवीण पवार, पोलीस उपायुक्‍त श्रीमती शर्मिष्ठा घारगे-वालावलकर यांच्या मार्गदर्शनाखाली सहायक पोलीस आयुक्‍त सुभाष भुजंग, पोलीस निरीक्षक अमोल देवकर, पोलीस निरीक्षक राजेश यादव, सहायक पोलीस निरीक्षक हरेश्वर घुगे, सचिन मिरधे, पोलीस उपनिरीक्षक उत्रेश्वर मुंडे यांनी त्यांच्या अधिपत्याखालील अधिकारी व अंमलदार यांच्यासोबत मिळून केली. यापुढेही अशाच प्रकारे नियम मोडणाऱ्या वाहनचालकांवर कारवाई केली जाणार आहे. त्यामुळे वाहनधारकांनी वाहनचालक परवाना, वाहनांची कागदपत्रे सोबत बाळगावी. वाहतूक नियमांचे पालन करावे, असे आवाहन वाहतूक विभागाने केले आहे.