छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : वाळूज एमआयडीसी परिसरातील जोगेश्वरी येथे हातात तलवार आणि सुरा घेऊन दादागिरी करत फिरणाऱ्या परवेज उर्फ शाहरुख बाशीद शेख याची मानगूट पकडून पोलिसांनी लॉकअपमध्ये डांबले आहे. तो या भागात दादा कोण, असे विचारत दहशत माजवत होता. पोलिसांनी त्याची दहशत अशी संपवली, की यापुढे तो तोंड वर करून चालूही शकणार नाही. बुधवारी (१९ नोव्हेंबर) त्याच्यावर कठोर कारवाई करण्यात आली.
शाहरुख कायम तलवार बाळगून असायचा. रस्त्यात तलवार नाचवून दहशत माजवायचा. नागरिकांना धमक्या द्यायचा. लोक त्याच्या भीतीने पोलिसांत जायलाही घाबरत होते. याबद्दलची गोपनीय माहिती वाळूज एमआयडीसी पोलीस ठाण्याचे वरिष्ठ पोलीस निरीक्षक रामेश्वर गाडे यांना कळली. त्यांनी विशेष पथकाला शाहरुखवर कारवाईचे आदेश दिले. पोलीस उपनिरीक्षक सागर पाटील यांच्या पथकाने जोगेश्वरीत सापळा रचून शाहरुखला ताब्यात घेतले. त्याच्याकडून ५ हजार ५०० रुपयांची धारदार तलवार आणि सुरा अशी दोन शस्त्रे जप्त केली आहेत.
त्याच्याविरुद्ध गुन्हा दाखल करून अटक करण्यात आली आहे. त्याची गुंडगिरी संपुष्टात आल्याने नागरिकांनी सुटकेचा निःश्वास सोडला. ही कारवाई पोलीस आयुक्त विरेंद्र मिश्रा, पोलीस उपायुक्त पंकज अतुलकर आणि सहायक पोलीस आयुक्त भागिरथी पवार यांच्या मार्गदर्शनाखाली वाळूज एमआयडीसीचे वरिष्ठ पोलीस निरीक्षक रामेश्वर गाडे, पोलीस उपनिरीक्षक सागर पाटील, पोलीस अंमलदार धीरज काबलिये, राजाराम वाघ, दीपक जाधव, सुरेश भिसे, रोहित चिंधाळे, जयेश साळुंके, सचिन ठोकळ, संतोष बमनात आणि संदीप तागड यांनी केली.
.jpg)
.jpg)
.jpg)
