पत्नीच्या डोक्यात मुसळी घातली, मुलाला हातावर काच मारून केले जखमी, पोलिसांत जाऊ नये म्हणून घरात कोंडले, सातारा परिसरातील घटना 

छत्रपती संभाजीनगर (मेट्रोपोलिस पोस्ट वृत्तसेवा) : पती-पत्‍नीतील क्षुल्लक वादानंतर पतीने पत्नीला मारहाण करत मुसळी डोक्यात मारून जखमी केले. आईला वाचवायला मध्ये पडलेल्या १४ वर्षीय मुलाच्याही हातावर काच मारून जखमी केले. नंतर मायलेकाला घरात कोंडून टाकले. ही घटना सातारा परिसरातील राहुलनगरात रविवारी (२८ डिसेंबर) दुपारी घडली.

सुनिल अंबादास होगे पाटील (वय ३४, रा. राहुलनगर) असे सातारा पोलिसांनी गुन्हा दाखल केलेल्या पतीचे नाव आहे. त्यांची पत्नी सीमा (वय २८, रा. राहुलनगर) यांनी त्यांच्याविरुद्ध तक्रार दिली आहे. सीमा या ब्युटीपार्लरमध्ये नोकरी करतात. सुनील खासगी कंपनीत नोकरी करतात. तक्रारीत म्हटले आहे, की पती सतत घरगुती कारणावरून शिवीगाळ करून मारहाण करतात. चार वर्षांपासून त्यांच्यात कौटुंबिक वाद आहेत. रविवारी (२८ डिसेंबर) दुपारी २ च्या सुमारास त्या घरी असताना सुनिल यांनी तू माझे कपडे का धुतले नाही, असे म्हणून वाद घालून शिवीगाळ केली.

हाताचापटाने मारहाण केली. घरातील पार्लरचे सामान फोडून नुकसान केले. मिरची कुटण्याची मुसळी घेऊन त्यांच्या डोक्यात मारून जखमी केले. १४ वर्षांचा मुलगा भांडण सोडवण्यासाठी मध्ये आल्याने सुनील यांनी त्यालाही बाजूला पडलेली काच घेऊन हातावर मारून जखमी केले. पोलिसांत तक्रार करण्यासाठी जाऊ नये म्हणून घरात बंद कोंडले. त्यानंतर दुसऱ्या दिवशी २९ डिसेंबरला सकाळी साडेदहाला दरवाजा उघडला व परत दोघांना शिवीगाळ केली. सीमा यांनी मुलासह सायंकाळी सातारा पोलीस ठाणे गाठून तक्रार दिली. पोलिसांनी त्यांना घाटी रुग्णालयात पाठवले. अधिक तपास पोलीस अंमलदार तुकाराम सोनुने करत आहेत.