वाळूज MIDC त पोलिसांचा धाक गेला कुठे? : रस्‍त्‍यात कार उभी करून मद्यधुंद तरुण अर्धा तास रंगला रील, सेल्फी शूटमध्ये, वैतागलेल्या वाहनधारकांनी राँगसाईडने गाड्या नेल्या...

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : अवघे शहर पोलीस एकीकडे गुन्हेगारी आणि गुन्हेगारीबद्दल सक्‍त झाले असताना, शहर पोलिसांचाच एक भाग असलेले वाळूज एमआयडीसी पोलीस मात्र गुन्हेगारांवर वचक ठेवण्यात सपशेल अपयशी ठरत असल्याचे चित्र आहे. वाळूज एमआयडीसीतील वाढत्‍या गुन्हेगारी घटना पाहता पोलिसांनी गुन्हेगारांवर वचक ठेवण्यासाठी मरगळ झटकून कामाला लागण्याची गरज व्यक्‍त होत आहे. आज, १४ सप्टेंबरला एका नशेखोराने जे केले, ते धक्कादायक आहे.

सायंकाळी साडेसातच्या सुमारास दारूड्या कारचालकाने महाराणा प्रताप चौकात विरुद्ध बाजूने येत चक्क कार रस्‍त्‍यातच उभी केली. त्‍यामुळे वाहतूक कोंडी सुरू झाली. मात्र नको डोक्‍याला ताप म्हणून वाहनधारकांनीही मग दुसऱ्या बाजूने (विरुद्ध दिशेने) जायला सुरुवात केली. जवळपास अर्धा तास हा तरुण नशेत रस्त्यावर रील बनवत होता. सेल्फी काढत होता. नंतर त्याने रस्‍त्‍यावरून कार काढली आणि निघून गेला. 

लोक का विरोध टाळतात?
वाळूज एमआयडीसीतील कायदा-सुव्यवस्थेची स्थिती दुर्दैवी झाली आहे. गुन्हेगार, टवाळखोर, नशेखोरांना कायद्याचा धाक राहिलेला नाही. वारंवार उद्योजकांनी यावर आवाजही उठवला आहे. पण आश्वासनांच्या पलिकडे त्‍यांना काही दिलासा मिळालेला नाही. थोडाही वाद झाला, की नशेखोर चाकू काढतात. रस्‍त्‍यातच हाणामारी सुरू करतात. त्‍यामुळे कामगार वर्ग धास्तावला आहे. तरुणाने बिनदिक्कत रस्‍त्‍यात कार उभी करून अर्धा तास वाहतूक कोंडी केली. पण एकाही नागरिकाने हटकण्याची तसदी घेतली नाही. कारण पुढे काय होईल, याची कल्पना करूनच त्‍यांच्या अंगावर काटा आलेला असतो. शहरात ज्‍या पद्धतीने पोलीस आयुक्‍तांनी पोलिसांचा दरारा गुन्हेगारांवर बसवायला सुरुवात केली आहे. त्‍याचपद्धतीने वाळूज एमआयडीसीकडेही लक्ष द्यावे, अशी मागणी उद्योजक, कामगार वर्गातून होत आहे.