प्रेम, शरीरसंबंध अन्‌ ब्रेकअप!; २१ वर्षीय तरुणी आत्‍महत्‍येला निघाली, पोलिसांनी वाचवले, प्रियकराविरुद्ध केला बलात्‍काराचा गुन्हा दाखल

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : २१ वर्षीय तरुणीवर जाळे फेकले, लग्नाच्या आमिषाने तिच्यासोबत शारीरिक संबंध ठेवले. नंतर तू कोण, मी कोण, असा पवित्रा घेत तिच्या संपर्क तोडला. त्‍यामुळे तरुणी नैराश्यात गेली... आता माझ्यासाठी सर्व काही संपलं, असं म्हणत आत्‍महत्‍येसाठी निघाली... पोलिसांनी तिला अडवून समजूत काढली. ही घटना बुधवारी (१७ सप्‍टेंबर) सकाळी घडली. रात्री पुंडलिकनगर पोलीस ठाण्यात प्रियकर प्रशांत मनोज राठोड (२१, रा. गणेशनगर, गारखेडा) याच्याविरुद्ध तरुणीच्या तक्रारीवरून बलात्काराचा गुन्हा दाखल करण्यात आला.

आई, आजीसोबत राहणाऱ्या तरुणीची गेल्या फेब्रुवारी महिन्यात प्रशांतशी ओळख झाली. ओळखीचे रुपांतर मैत्रीत आणि मैत्रीचे रूपांतर प्रेमात झाले. प्रशांत लग्नाचे आमिष दाखवून तिचा उपभोग घेऊ लागला. मात्र तरुणीने त्याच्याकडे लग्नाचा विषय काढला की तो टाळाटाळ करायचा. काही दिवसांपासून तिने लग्नाचा तगादा लावल्याने त्याने संपर्कच तोडला. यामुळे तरुणी नैराश्यात गेली, ज्‍याच्यासोबत संसाराची स्वप्ने बघितली त्‍याने ब्रेकअप केल्याने ती हादरून गेली. तिने त्‍याला भेटण्याचा प्रयत्न केला. त्‍याच्या घरी गेली असता त्याच्या आई- वडिलांनी तिला मारहाण केली.

...अन्‌ निघाली आत्‍महत्‍या करायला!
बुधवारी दुपारी ती अनवाणी रस्त्याने रडतच जात होती. ही बाब शिवसेना शहरप्रमुख हरिभाऊ हिवाळे यांच्या लक्षात आली. त्यांनी तिला थांबवले. दामिनी पथकाला कळवले. पोलीस उपनिरीक्षक कांचन मिरधे, सहायक पोलीस उपनिरीक्षक लता जाधव, पोलीस अंमलदार साक्षी चंद्रे, कविता गवळी यांनी तिथे लगेचच येत तरुणीची विचारपूस केली. तिची समजूत काढून पुंडलिकनगर पोलीस ठाण्यात नेले. या वेळी ती पोलिसांना सातत्याने मला मरायचे आहे, माझं सगळं संपलं... असे म्हणत होती. पोलीस निरीक्षक अशोक भंडारे, सहायक पोलीस निरीक्षक शिवप्रसाद कऱ्हाळे, पोलीस उपनिरीक्षक रेशीम कोळेकर यांनी तिची समजूत काढली. त्यानंतर तरुणीच्या तक्रारीवरून प्रशांतविरुद्ध बलात्काराचा गुन्हा दाखल केला आहे. अधिक तपास केला जात आहे.