छत्रपती संभाजीनगर (मेट्रोपोलिस पोस्ट वृत्तसेवा) : कल्पना भागवतचे प्रकरण सध्या तरी आयएएस अधिकारी असल्याचे भासवून फसवणूक करण्यापर्यंतच मर्यादित असल्याचे समोर येत आहे. तिने पैसे उकळलेल्या व्यक्तींना आता पोलीस गुन्ह्यात साक्षीदार करण्याची शक्यता आहे. पोलीस कोठडीची मुदत संपत असल्याने आज, ६ डिसेंबरला दुपारी तिला पुन्हा न्यायालयात हजर करण्यात येईल.
आतापर्यंत कल्पना १३ दिवस पोलीस कोठडीत राहिली असून, या १३ दिवसांत तिने पोलिसांना फारसे सहकार्य केलेले नाही. पोलिसांना १४ दिवसांच्या पोलीस कोठडीचा अधिकार असतो. त्यामुळे १ च दिवस शिल्लक आहे. त्यामुळे हाताशी असलेला १ दिवस शिल्लक ठेवून आता पोलीस तांत्रिक पुरावे आणि नोटीस पाठवलेल्या २८ जणांचे जबाब नोंदवून तपास करतील, अशी शक्यता आहे. त्यामुळे आज कल्पनाची न्यायालयीन कोठडीत रवानगी होऊ शकते. आयएएस अधिकारी असल्याचे कल्पनाने अनेकांना गंडवले आहे. तिच्या अफगाणी मित्रामुळे या प्रकरणात राष्ट्रीय तपास संस्थाही सतर्क झाल्या होत्या. त्यांनीही कल्पनाची चौकशी केली आहे. तिच्या मोबाइलमध्ये आढळलेले विदेशी नंबर, तिने पाकिस्तानमध्ये पाठवलेले पैसे, दिल्ली बॉम्बस्फोटावेळी तिचा दिल्लीत असलेला मुक्काम या सर्व पार्श्वभूमीवर मोठा संशय निर्माण झाला होता. मात्र आर्थिक फसवणुकी पलिकडे फारसे काही हाती लागलेले नाही.
काय आहे प्रकरण?कल्पना भागवत ६ महिन्यांपासून जालना रोडवरील ॲम्बेसेडर या फाइव्ह स्टार हॉटेलमध्ये मुक्कामी थांबल्याची गोपनीय माहिती सिडको पोलिसांना मिळाली होती. पोलीस निरीक्षक अतुल येरमे यांनी हर्सूलच्या पोलीस निरीक्षक स्वाती केदार, सहायक पोलीस निरीक्षक अरुणा घुले, वर्षा काळे यांच्यासह हॉटेलमध्ये जाऊन २२ नोव्हेंबरला कल्पनाला अटक केली. तिच्याविरुद्ध सिडको पोलीस ठाण्यातील अंमलदार सतीश बोर्डे यांनी तक्रार दिली आहे. कल्पनाने हॉटेलमध्ये थांबण्यासाठी जे आधारकार्ड दिले होते, त्यावर खाडाखोड केल्याचे दिसून आले होते. तिच्याकडे केंद्रीय लोकसेवा आयोगातील २०१७ ची यादीही तिच्याकडे मिळाली होती. ही यादीही बनावट असल्याचे स्पष्ट झाले होते. या प्रकरणात कल्पनासह तिचा अफगाणी प्रियकर मोहम्मद अशरफ गिल (वय २४, ह. मु. जंगपुरा, नवी दिल्ली) व केंद्रीय गृहमंत्र्यांच्या ओएसडींच्या नावाचा वापर करणारा तोतया अधिकारी डिम्पी देवेंद्रकुमार हरजाई (वय ३०, रा. पालम, दिल्ली) यांना अटक करण्यात आली आहे. अशरफचा भाऊ पाकिस्तानमध्ये राहतो. त्याला कल्पना आणि डिम्पीच्या मदतीने भारतात घुसखोरी करायची होती, असे चौकशी समोर आले होते.
.jpg)
