चोरीची मोटारसायकल विकण्यासाठी शिवाजीनगरात आला, जवाहरनगर पोलिसांनी आवळल्या मुसक्या!

छत्रपती संभाजीनगर (मेट्रोपोलिस पोस्ट वृत्तसेवा) : वाळूज एमआयडीसी परिसरातून चोरीला गेलेली मोटारसायकल शिवाजीनगरात एका तरुणाकडे मिळून आली. तो ही चोरीची मोटारसायकल विकण्यासाठी आला होता. जवाहरनगर पोलिसांनी त्याच्यावर झडप घातली आणि मोटारसायकलीसह त्याला ताब्यात घेतले. ही कारवाई बुधवारी (१९ नोव्‍हेंबर) करण्यात आली.

आकाश रमेश राठोड (वय २३, रा. सातारा तांडा नं. १ सातारा परिसर छत्रपती संभाजीनगर) असे संशयिताचे नाव आहे. पोलीस ठाण्याच्या हद्दीत गस्त घालत असताना पोलीस अंमलदार मारोती गोरे यांना गुप्त बातमीदारामार्फत माहिती मिळाली की, शिवाजीनगर परिसरात आकाश चोरीची मोटारसायकल घेऊन येणार आहे. मारोती गोरे यांनी लगेचच ही माहिती वरिष्ठ पोलीस निरीक्षक सचिन कुंभार यांना दिली. त्यांच्या आदेशाने श्री. गोरे यांच्यासह पोलीस अंमलदार अनिल भाले, संदिप बिलारी शिवाजीनगर गाठले. तिथे डीपीजवळ आकाश विनानंबरच्या मोटारसायकलीसह दिसून आला. पोलिसांनी त्याला पकडून चौकशी केली असता त्याने उडवाउडवीची उत्तरे दिली.

पोलिसांनी मोटारसायकलीच्या चेसीस नंबरवरून गाडीचा क्रमांक मिळवला. एमएच २० एफव्ही ४६०८ क्रमांकाची ही दुचाकी असल्याचे समोर आले. मोटारसायकल वैभव बाळकृष्ण वाघोले यांच्या नावावर असून पोलिसांनी त्यांना संपर्क केला असता, त्यांनी मोटारसायकल चोरीला गेलेली असून, वाळूज एमआयडीसी पोलीस ठाण्यात तक्रार दिल्याचे सांगितले. वाळूज एमआयडीसी पोलिसांशी संपर्क करून अंमलदार राम तांदळे यांच्याकडे जवाहरनगर पोलिसांनी आकाश आणि चोरीचा मोटारसायकल पुढील तपासासाठी सुपूर्द केली. ही कारवाई पोलीस आयुक्त विरेंद्र मिश्रा, पोलीस उपायुक्त प्रशांत स्वामी, सहायक पोलीस आयुक्त सागर देशमुख, वरिष्ठ पोलीस निरीक्षक सचिन कुंभार यांच्या मार्गदर्शनाखाली पोलीस अंमलदार अनिल भाले, मारोती गोरे, संदीप बिलारी यांनी केली.