जयभवानीनगरात गावगुंडांचा ट्युशन क्लासमध्ये घुसून शिक्षकावर चाकूचे वार, तोडफोड करत बेदम मारहाण!

छत्रपती संभाजीनगर (मेट्रोपोलिस पोस्ट वृत्तसेवा) : मुकुंदवाडी पोलीस ठाण्याच्या हद्दीत गावगुंडांनी अक्षरशः धुमाकूळ घातला आहे. लुटमार, खंडणी वसुली, चाकूहल्ले, नशेखोरांचा धुडगूस, महिला-मुलींच्या छेडछाडीच्या घटना सर्रास घडत असताना नागरिक जीव मुठीत घेऊन वावरत आहेत. पोलीस मात्र या सर्वांवर अंकुश लावण्यात अपयशी ठरत असल्याचा आरोप होत आहे. शनिवारी (२९ नोव्हेंबर) सायंकाळी पाचला जयभवानीनगरमध्ये गावगुंडांनी एका ट्युशन क्लासमध्ये घुसून शिक्षकावर चाकू हल्ला करत खंडणी मागितली.

४७ वर्षीय शिक्षक नारायण आनंदे यांनी मुकुंदवाडी पोलीस ठाण्यात तक्रार दिली आहे. तक्रारीनुसार, ते जयभवानीनगरात खासगी शिकवणी (ट्यूशन) घेतात. ट्यूशनमध्ये असताना आशिष परागकर, दीपक वाघमारे यांनी साथीदारांसह ट्युशनमध्ये घुसखोरी केली. तुझा क्लास खूप चांगला चालतो. आम्हालाही पैसे दे, असे म्हणत त्यांनी आनंदे यांच्याकडे खंडणी मागितली. आनंदे यांनी नकार देताच एकाने त्यांच्या हातावर चाकूने वार केले. इतरांनी तोडफोड सुरू करत आनंदे यांना बेदम मारहाण केली.

गंभीर जखमी होऊन आनंदे कोसळल्याले. त्यानंतर धमकी देत गावगुंड निघून गेले. या वेळी विद्यार्थी प्रचंड घाबरले होते. आनंदे यांना खासगी रुग्णालयात दाखल केले असून, हल्ल्यात चाकूमुळे हाताला गंभीर इजा झाली आहे. मारहाणीत डाव्या पायाचे हाडही फ्रॅक्चर झाले आहे. मुकुंदवाडी पोलिसांनी रविवारी (३० नोव्हेंबर) याप्रकरणात गुन्हा दाखल केला. मात्र वृत्त लिहीपर्यंत हल्लेखोरांना अटक केली नव्हती. पोलिसांच्या बोटचेप्या भूमिकेमुळे गावगुंडांचे फावत असून, दिवसेंदिवस त्यांची हिंमत वाढत चालली आहे.